Bakala mosi yina vandaka kukuka ve kutambula, vandaka konso kilumbu na kielo ya tempelo mpi vandaka kulomba mbongo. Kilumbu mosi na nima ya midi, yandi monaka Piere mpi Yoane ke kota na tempelo. Yandi tubilaka bo nde: ‘Pardo beno pesa mono mbongo.’ Piere tubilaka yandi nde: ‘Mono ta pesa nge kima mosi ya kitoko yina me luta mbongo. Na zina ya Yezu, telama mpi tambula!’ Na nima, Piere sadisaka yandi na kutelama, mpi bakala yina yantikaka kutambula! Kimangu yina pesaka kimvuka ya bantu kiese mingi yo yina bantu mingi kibeni kumaka kukwikila.

Kansi, banganga-nzambi mpi Basaduse waka makasi. Bo kangaka bantumwa, bo nataka bo na tribinale, mpi bo yulaka bo nde: ‘Nani me pesa beno ngolo ya kubelula bakala yai?’ Piere vutulaka nde: ‘Beto me baka ngolo na Yezu Kristu yina beno fwaka.’ Bamfumu ya mabundu tubaka na ndinga ya ngolo nde: ‘Beno bika kutuba mambu ya Yezu!’ Kansi bantumwa tubaka nde: ‘Beto fwete tuba mambu na yandi. Beto ta bika ve.’

Ntangu bo yambulaka bo, na mbala mosi Piere ti Yoane kwendaka na balongoki ya nkaka mpi bo songaka bo mambu yina salamaka. Bo sambaka kumosi, mpi bo songaka Yehowa nde: ‘Pardo sadisa beto sambu beto vanda kikesa sambu na kulanda kusala kisalu na nge.’ Yehowa pesaka bo mpeve santu na yandi, mpi bo landaka kusamuna mpi kubelula bantu. Bantu mingi kibeni kumaka kukwikila. Basaduse waka kimpala yo yina bo kangaka bantumwa mpi bo tulaka bo na boloko. Kansi na mpimpa, Yehowa tindaka wanzio mosi; yandi kangulaka bakielo ya boloko mpi tubilaka bantumwa nde: ‘Beno vutuka na tempelo, mpi beno longa kuna.’

Na suka-suka, bo zabisaka Sanedreni, tribinale ya bamfumu ya mabundu nde: ‘Boloko kele ya kukanga, kansi bantu yina beno kangaka me tina! Bo kele na tempelo, mpi bo ke longa bantu!’ Bo kangaka diaka bantumwa mpi bo nataka bo na Sanedreni.  Nganga-nzambi ya nene tubaka nde: ‘Beto buyisaka beno na kutuba mambu ya Yezu!’ Kansi, Piere vutulaka nde: “Beto fwete lemfukila Nzambi bonso mfumu na kisika ya kulemfukila bantu.”

Bamfumu ya mabundu waka makasi mingi yo yina bo zolaka kufwa bantumwa. Kansi, Mufarize mosi, zina na yandi Gamaliele, telamaka mpi tubaka nde: ‘Beno keba! Mbala ya nkaka Nzambi kele ti bantu yai. Beno ke zola kibeni kunwanisa Nzambi?’ Bo ndimaka ndongisila na yandi. Na nima ya kubula bantumwa bafimbu, bo buyisaka bo diaka na kulonga, mpi na nima bo yambulaka bo. Kansi diambu yina kangaka ve bantumwa nzila. Bo landaka kulonga nsangu ya mbote na kikesa, na tempelo mpi nzo na nzo.