Mũndũ ũmwe warĩ kĩonje na ndetwaraga aaikaraga thĩ o mũthenya kĩhingo-inĩ kĩa hekarũ akĩhoyahoyaga. Hĩndĩ ĩmwe thutha wa mĩaraho nĩ onire Petero na Johana magĩthiĩ hekarũ-inĩ. Aamerire ũũ: ‘Ndamũthaitha mũhe kĩndũ.’ Nake Petero akĩmwĩra: ‘Ndĩ na kĩndũ kĩega ingĩkũhe gũkĩra mbeca. Thĩinĩ wa rĩĩtwa rĩa Jesu, rũgama wĩtware!’ Petero nĩ aamũteithĩrĩirie kũrũgama na mũndũ ũcio akĩambĩrĩria gwĩtwara! Kĩrĩndĩ nĩ gĩakenire mũno nĩ ũndũ wa kĩama kĩu ũũ atĩ andũ aingĩ nĩ maatuĩkire etĩkia.

Athĩnjĩri-Ngai na Asadukai nĩ maarakarire mũno. Maanyitire atũmwo, makĩmatwara igooti-inĩ na makĩmoria ũũ: ‘Nũ ũmũheete hinya wa kũhonia mũndũ ũyũ?’ Nake Petero akiuga: ‘Tũheetwo hinya nĩ Jesu Kristo ũrĩa mworagire.’ Atongoria a ndini maanĩrĩire ũũ: ‘Mũtikarie ũhoro wa Jesu rĩngĩ!’ Nao atũmwo makĩmeera ũũ: ‘No mũhaka twarie ũhoro wake. Tũtigũtiga.’

Rĩrĩa Petero na Johana maarekereirio, nĩ maathiire kũrĩ arutwo acio na makĩmeera ũrĩa kwahanĩkĩte. Maahoire Jehova ũũ marĩ hamwe: ‘Twagũthaitha ũtũhe ũmĩrĩru nĩguo tũhote gũthiĩ na mbere kũruta wĩra waku.’ Jehova nĩ aamaheire roho wake mũtheru na magĩthiĩ na mbere kũhunjia na kũhonania. Andũ aingĩ mũno nĩ maatuĩkire etĩkia. Asadukai nĩ maaiguire ũiru mũno nginya makĩnyita atũmwo na makĩmaikia njera. No ũtukũ ũcio Jehova nĩ aatũmire mũraika athiĩ ahingũre mĩrango ya njera na akĩra atũmwo acio ũũ: ‘Cokai hekarũ-inĩ mũkarutane kuo.’

Mũthenya ũyũ ũngĩ rũcinĩ, igooti rĩa atongoria a ndini rĩrĩa rĩetagwo Sanhedrini, nĩ rĩerirũo ũũ: ‘Njera no hinge, no athuri arĩa mũranyitire matirĩ kuo! Marĩ hekarũ-inĩ makĩruta andũ!’ Atũmwo acio nĩ maanyitirũo rĩngĩ na  magĩtwarũo kũrĩ Sanhedrini. Mũthĩnjĩri-Ngai ũrĩa mũnene oigire ũũ: ‘Na githĩ tũtiramwathire mũtige kwaria ũhoro wa Jesu!’ No Petero akĩmũcokeria ũũ: “No mũhaka twathĩkĩre Ngai arĩ we mũtongoria, no ti andũ.”

Atongoria acio a ndini nĩ maarakarire mũno nginya makĩenda kũũraga atũmwo acio. No Mũfarisai ũmwe wetagwo Gamalieli aarũgamire akiuga: ‘Mwĩmenyererei mũno! No gũkorũo Ngai arĩ hamwe na andũ aya. Mũrenda kũrũa na Ngai?’ Nĩ maathĩkĩire ũtaaro wake. Maahũrire atũmwo acio iboko, makĩmaatha o rĩngĩ matige kũhunjia, magĩcoka makĩmarekereria. No ũndũ ũcio ndwatũmire atũmwo matige kũhunjia. Maathiire na mbere kũhunjia ũhoro ũrĩa mwega thĩinĩ wa hekarũ na mũciĩ kwa mũciĩ marĩ na ũmĩrĩru.