Opa li omulumenhu umwe iha ende nokwa li ha kala omutumba nokweehela efiku keshe poshivelo sholuumbo lotembeli. Omutenya umwe, okwa li a mona Petrus naJohannes tava i motembeli. Okwe va lombwela a ti: ‘Alikana pe i nge sha.’ Petrus okwa ti: ‘Ohandi ku pe oshinima shi na ondilo shi dule oimaliwa. Fikama u ende medina laJesus!’ Opo nee Petrus okwe mu kwafela a fikame, nomulumenhu okwa hovela okweenda. Ovanhu ova li va hafa neenghono omolwoshikumwifilonga osho, navahapu ova li va ninga ovaitaveli.

Ashike ovapristeri nOvasadukai ova li va handuka. Ova li va kwata ovayapostoli ndele tave va twala komhangu, noku va pula tava ti: ‘Olyelye e mu pa eenghono dokuvelula omulumenhu ou?’ Petrus okwa ti: ‘Otwa pewa eenghono kuJesus Kristus, oo mwa li mwa dipaa.’ Ovawiliki vomalongelokalunga ova ingida tava ti: ‘Efeni okupopya kombinga yaJesus!’ Ashike ovayapostoli ova ti: ‘Otu na okupopya kombinga yaye. Itatu mwena.’

Diva eshi Petrus naJohannes va mangululwa, ova li va ya kovahongwa vakwao noku va lombwela osho sha ningwa po. Ova li va ilikana pamwe, tava pula Jehova tava ti: ‘Alikana tu kwafela tu kale ovaladi opo tu dule okutwikila okulonga oilonga yoye.’ Jehova okwe va pa omhepo yaye iyapuki, nova li va twikila okuudifa nokuvelula ovanhu. Ovanhu vahapu ova li va ninga ovaitaveli. Ovasadukai ova li va twa ondubo neenghono, nomolwaasho ova li va kwata po ovayapostoli noku va tula modolongo. Ashike Jehova okwa li a tuma omweengeli oufiku, ndele ta yeulula oivelo yodolongo nokulombwela ovayapostoli ta ti: ‘Shuneni kotembeli ndele tamu ka udifa.’

Ongula ya landula ko, omhangu yovawiliki vomalongelokalunga Oshijuda oya li ya lombwelwa taku ti: ‘Odolongo oya patwa natango, ashike ovalumenhu ovo mwa li mwa kwata kave mo. Ove li kotembeli tava hongo ovanhu.’ Ovayapostoli ova li va kwatwa vali ndele tava twalwa komhangu. Omupristeri omukulunhu okwa ti: ‘Otwe mu lombwela muha popye vali kombinga yaJesus.’  Ashike Petrus okwa nyamukula a ti: ‘Otu na okudulika kuKalunga e li omupangeli, ponhele yokudulika kovapangeli vopanhu.’

Ovawiliki vomalongelokalunga ova li va handuka neenghono nova li va hala okudipaa ovayapostoli. Ashike Omufarisai wedina Gamaliel okwa fikama ndele ta ti: ‘Lungameni! Kalunga otashi dulika e li pamwe novanhu ovo. Omwa hala ngoo shili okukondjifa Kalunga?’ Ova li va pwilikina komayele aye. Konima eshi va denga ovayapostoli neengola, ova li ve va lombwela vali va efe po okuudifa ndele tave va efa va ye. Ashike osho kasha li sha imba ovayapostoli vaha udife. Ova li va twikila okuudifa onghundana iwa nouladi motembeli nosho yo eumbo neumbo.