Kwajinga mwanamulume walemana wabulanga kwenda waikalanga ku kibelo kya nzubo ya Lesa na kulomba bantu. Juba jimo pa kulemba kwa juba, wamwene Petelo ne Yoano saka babena kwiya ku nzubo ya Lesa. Wibambijile’mba: ‘Mpepoi kyonse kyo muji nakyo.’ Petelo wamwambijile’mba: ‘Nsakukupa kyakila mali. Mu jizhina ja Yesu Kilishitu, imana wende!’ Kepo Petelo amukwachile ku kuboko ne kumwimanya. Ponkapotu watendekele kwenda. Bantu basangalele bingi pa kumona kino kya kukumya kabiji bavula baitabijile ne kwikala baana ba bwanga.

Bañanga ne Basadusea bazhingijile bingi. Batwajile batumwa ku kochi ne kwibepuzha’mba: ‘Ñanyi wimupele bulume bwimulengela kubuka uno muntu?’ Petelo wibakumbwile’mba: “Twatambwile bulume kufuma kwi Yesu yenka ye mwayipayile.’ Bantangi ba bupopweshi bebambijile na bukaji amba: ‘Kwambanga pe Yesu ne.’ Batumwa baambile’mba: ‘Kechi tukaleka kwamba pe Yesu ne.’

Petelo ne Yoano byo bebalekeleko, ponkapotu bayile kwajinga batumwa bakwabo ne kwibabuula kyamwekele. Balombejile pamo kwi Yehoba amba: ‘Tukwashai tuchinchike pa kuba’mba tutwajijile kwingila mwingilo wenu.’ Yehoba wibapele mupashi wanji wazhila, kabiji batwajijile na kusapwila ne kubuka bantu. Bantu bavula baitabijile. Na mambo a kichima, Basadusea bakwachile batumwa ne kwibakasa mu kaleya. Bufuku Yehoba watumine malaika, washinkwile binzhilo bya kaleya ne kubula batumwa amba: ‘Mubwele mu nzubo ya Lesa na kufunjisha bantu.’

Byo bwakile lukelo, bantangi ba bupopweshi ba mukochi wa Saniedilini bebabujile’mba: ‘Twataana bashinkamo mu kaleya, bino banabalume bafwamo. Baji mu nzubo ya Lesa na kufunjisha bantu.’ Batumwa bebakwachile ne kwibaleta  mukochi wa Saniedilini. Ñanga mukatampe waambile’mba: ‘Twimukainye kwamba pe Yesu?’ Petelo wakumbwile’mba: “Lesa ye kalama ye twafwainwa kukookela kechi bantu ne.”

Bantangi ba bupopweshi bazhingijile kya kuba bakebelenga ne kwibepaya. Bino Mufaliseo umo wa jizhina ja Ngamaliela waimene ne kwamba’mba: ‘Balekai. Mambo kyamweka Lesa uji na bano bantu. Nanchi mubena kukeba kulwa ne Lesa nyi?’ Baumvwijile byo ebambijile. Bino byo bapwishishe kuzhipaula batumwa, bebakambizhe’mba bekileke kusapwila, kabiji bebalekele kebaye. Bino batumwa kechi balekele ne. Batwajijile kusapwila mambo awama mu nzubo ya Lesa ne ku nzubo ku nzubo.