Po bɛvɛi pum wa, o dio chiɛi Mɛlɛkaa ndoo chal waŋnda nyɔɔŋ piɛiyo lepaa o lepaa ni. Paale pilɛ, a teleŋ paale kalaa, mi poo hoo cha Pitɛ nda Chɔŋ kɔlaŋ o chiɛi Mɛlɛkaa niŋ. Mbo dimul nda aa: ‘Yandii, la ke ya kaniei.’ Mi Pitɛ dimul ndu aa: ‘I nɔ nyɛ o hiou kanieiyo le mi ke num. O diola Chiisu laŋ niŋ, chɔŋ ma kuɛ!’ Okoŋ, mi Pitɛ mala ndu mbo chaŋ, mbo kandu kɔlaŋ. Mi waŋnda duaunuŋ nyaale tau a kaamaa hoo, nduyɛ mi hei tosa mi wanaa bɔɔbɔɔ simnuŋ wanaa laalaŋnda.

Kɛ mi wanaa soliaa lasalaa a Sadusiiya tuulu kɔl. Ma bii Kiilaa haa, ma kua a nda o toŋgo nda kilul waŋnda yamaŋ ndo niŋ. Ma nyuna nda aa: ‘Nɛɛnɛ ke yɛ nya kpaayaa le poo hoo siŋgioo?’ Mi Pitɛ dimul nda aa: ‘Chiisu Kiliti ke naa kpaayaa ni. O nya dii koŋ ndo.’ Mi simlachiaa lepiɛiya deŋi choo choo aa: ‘Pɛŋgi suɛi a Chiisu okɔɔ.’ Mi kiilaa dimul nda aa: ‘Ŋ nɔ miŋ soo a ndu okɔɔ. Nduyɛ ŋ cho pɛŋgi le.’

Dimioo nuaa a mal Pitɛ nda Chɔŋ, ma kua o buɛiya a piliaa lo, ma kɔ dimul nda nyɛ ndoo yɔŋnuŋndo. Mi nda kpou piɛi latulu, ma dimul Chɛhowa aa: ‘Yandii, mala naa ma ke naa kɔl simulaa, le halikpeŋ miŋ hiou lachi a wali numndo tosaa.’ Mi Chɛhowa ke nda nyina diandaa, nduyɛ ma hiau lachi a yooŋgu kɛndɔɔ dimioo vɛlɛ a waŋnda siŋgioo. Mi wanaa bɔɔbɔɔ simnuŋ wanaa laalaŋnda. Mi Sadusiiya kandu nda paŋalaa. Le hei, ma bii kiilaa, ma kɔ wou nda o chiɛi manyumndo niŋ. Kɛ a nyumndaŋ, mi Chɛhowa yɔŋ maalikɛinɔ ndɔɔ, mbo kumbi diola chiɛi manyumndo, mbo dimul kiilaa aa: ‘La miiŋgu o chiɛi Mɛlɛkaa, mi la kɔ pɛɛku waŋnda loŋ.’

Diimandɔɔ, mi waŋnda huŋ dimul Laŋgbaa Kalaa Kialu Yamaŋ Nda aa: ‘Chiɛi manyumndo cho o baŋaa, kɛ puaa nya bii mi la wou nda loŋ nda cho lɛ loŋ te. A cho waŋnda pɛɛkoo o chiɛi Mɛlɛkaa niŋ.’ Okoŋ kɔɔli, ma bii vɛlɛ kiilaa, ma huŋ a nda Laŋgbaa Kalaa Kialu Yamaŋ Nda lachi. Mi masa wanaa soliaa lasalaa dimul  nda aa: ‘Ŋ dimul nya maa la pɛŋgi suɛi a Chiisu okɔɔ!’ Mi Pitɛ mulul ndu aa: “Ŋ nɔ miŋ diikuŋ Masanɔɔ Mɛlɛka, mbo hiou wanachioo.”

Mi simlachiaa lepiɛiya tuulu kɔl tau, nduyɛ ndaa yeema pɛŋ ma dii kiilaa Chiisu wa. Kɛ mi Falisiinɔ pilɛ diolaŋ Kameliɛɛ sim, mbo dimul nda aa: ‘La wa yekeŋ. Naapum Mɛlɛka cho puaa haa kɔɔli. La yeema mi la sɔŋga a Mɛlɛka?’ Ma yaŋ nilaŋ o sila ndɔɔ. Okoŋ, mɛɛ nda lɔɔ kiilaa, ma dimul nda vɛlɛ maa a pɛŋgi yooŋgu kɛndɔɔ dimioo. Nduyɛ ma mal nda. Kɛ keŋ kuuna kiilaa yooŋgu kɛndɔɔ dimioo le. Ma hiau lachi a yooŋgu kɛndɔɔ dimioo a kɔl simulaa o chiɛi Mɛlɛkaa niŋ, vɛlɛ a o chiɛila waŋnda.