တၢ်မၤလိ ၉၅
တၢ်လၢကမၤပတုာ် အဝဲသ့ၣ်အတၢ်မၤန့ၣ် တအိၣ်နီတမံၤဘၣ်
လၢတၢ်လုၢ်ဟံၣ်အပဲတြီအခီၣ်ထံးန့ၣ် ပိာ်ခွါလၢအဟးတသ့ဘၣ်တဂၤ ဆ့ၣ်နီၤဒီးဃ့အီၣ်တၢ်ဖဲန့ၣ် ကိးနံၤဒဲးလီၤ. ဘၣ်တနံၤ ဖဲမုၢ်ဃ့ၢ်လီၤအခါ အဝဲထံၣ်ဝဲစီၤပ့းတရူးဒီး စီၤယိၤဟၣ်ကလဲၤနုာ်လီၤလၢ တၢ်လုၢ်ဟံၣ်အပူၤလီၤ. ဖဲန့ၣ်အဆၢကတီၢ် ပိာ်ခွါအံၤတဲဘၣ်အဝဲသ့ၣ်လၢ– ‘ဝံသးစူၤဟ့ၣ်ယၤ တၢ်တမံၤမံၤမီၤ.’ စီၤပ့းတရူးတဲဆၢက့ၤအီၤလၢ– ‘ယကဟ့ၣ်နၤတၢ်ဟ့ၣ်လၢ အဂ့ၤဒိၣ်န့ၢ်ဒံးစ့လီၤ. လၢယ့ၣ်ၡူးအမံၤ ဂဲၤဆၢထၢၣ်ဒီးဟးတက့ၢ်.’ ဝံၤဒီး စီၤပ့းတရူးဝံၣ်ဆၢထၢၣ်အီၤ ဒီးပိာ်ခွါန့ၣ်ဟးထီၣ်ဝဲလီၤ. ပှၤဂီၢ်မုၢ်တဖၣ်သးခုဒိၣ်မးဒီး ပှၤအါဂၤကဲထီၣ်ဝဲ ယ့ၣ်ၡူးအပျဲၢ်အဘီၣ်လီၤ.
ဘၣ်ဆၣ်ပှၤလုၢ်တၢ်အဒိၣ် ဒီးပှၤစးဒူၤကဲတဖၣ် သးပှံၢ်ထီၣ်တၢ်ဒိၣ်မးလီၤ. အဝဲသ့ၣ်ဖီၣ်န့ၢ်ဝဲတၢ်မၢဖိတဖၣ် ဒီးလဲၤကိးဝဲဆူရူလီၤ. ဒီးအဝဲသ့ၣ်သံကွၢ်ဝဲလၢ– ‘ဒ်သိးသုကမၤဘျါ ပိာ်ခွါတဂၤအံၤအဂီၢ် မတၤတဂၤဟ့ၣ် သုတၢ်စိတၢ်ကမီၤလဲၣ်.’ စီၤပ့းတရူးတဲဝဲလၢ– ‘ပဒိးန့ၢ်ဘၣ်တၢ်စိတၢ်ကမီၤလၢ ယ့ၣ်ၡူးခရံာ်လၢသုမၤသံအီၤတဂၤန့ၣ်အအိၣ်လီၤ.’ တၢ်ဘူၣ်တၢ်ဘါခိၣ်နၢ်တဖၣ် ကိးပသူထီၣ်လၢ– ‘တဘၣ်တဲ ယ့ၣ်ၡူးအဂ့ၢ်လၢၤတဂ့ၤ.’ ဘၣ်ဆၣ် တၢ်မၢဖိတဖၣ်တဲဝဲလၢ– ‘ပကဘၣ်တဲ ယ့ၣ်ၡူးအဂ့ၢ်လီၤ. ပတတဲဘၣ်, တန့ၢ်ဘၣ်.’
ဖဲပှၤပျၢ်လီၤစီၤပ့းတရူး ဒီးစီၤယိၤဟၣ်ဝံၤအလီၢ်ခံ အဝဲသ့ၣ်လဲၤဝဲဆူ ယ့ၣ်ၡူးအပျဲၢ်အဘီၣ်အဂၤတဖၣ် အအိၣ်ဒီး တဲဘၣ်အဝဲသ့ၣ်လၢ တၢ်ဟဲကဲထီၣ်အသးအဂ့ၢ်န့ၣ်လီၤ. အဝဲသ့ၣ်ဃ့ဘါထုကဖၣ်တၢ်တပူၤဃီ ဒီးဃ့ယဟိဝၤယွၤလၢ– ‘ဒ်သိးပကအိၣ်ဒီးတၢ်သးဒူ လၢပကဆဲးမၤနတၢ်မၤအဂီၢ်န့ၣ် ဝံသးစူၤမၤစၢၤပှၤတက့ၢ်.’ ယဟိဝၤယွၤဟ့ၣ်လီၤအဝဲသ့ၣ် သးစီဆှံလီၤ. ဒီးအဝဲသ့ၣ်ဆဲးစံၣ်တဲၤတဲလီၤတၢ် ဒီးမၤဘျါက့ၤပှၤဂၤအတၢ်ဆါလီၤ. လၢတၢ်န့ၣ်အဃိ ပှၤအါဂၤကဲထီၣ်ဝဲ ယ့ၣ်ၡူးအပျဲၢ်အဘီၣ်လီၤ. ပှၤစးဒူၤကဲတဖၣ် သးက့ၣ်အဝဲသ့ၣ် ဒီးဖီၣ်န့ၢ်ဝဲတၢ်မၢဖိတဖၣ် ဒီးပာ်လီၤအဝဲသ့ၣ်လၢဃိာ်ပူၤလီၤ. ဘၣ်ဆၣ်ဖဲမုၢ်နၤခီန့ၣ် ယဟိဝၤယွၤဆှၢလီၤဝဲ မူခိၣ်ကလူးတဂၤ လၢကဟဲအိးထီၣ်ဝဲဃိာ်အပဲတရီ ဒီးတဲဘၣ်တၢ်မၢဖိတဖၣ်လၢ– ‘က့ၤဆူတၢ်လုၢ်ဟံၣ် ဒီးသိၣ်လိသီလိတၢ်ဖဲန့ၣ်တက့ၢ်.’
မုၢ်ဆ့ၣ်ထီၣ်လၢခံတဂီၤ လၢပှၤယူဒၤဖိအရူလၢအဒိၣ်ကတၢၢ်အပူၤန့ၣ် ပှၤတဲဘၣ်တၢ်ဘူၣ်တၢ်ဘါခိၣ်နၢ်တဖၣ်လၢ– ‘ပှၤကးတံာ်ဃာ် ဃိာ်အပဲတရီဂ့ၤဂ့ၤလီၤ. ဘၣ်ဆၣ် ပိာ်ခွါလၢသုဖီၣ်န့ၣ် တအိၣ်လၢၤဘၣ်. အဝဲသ့ၣ်အိၣ်လၢ တၢ်လုၢ်ဟံၣ်အပူၤ ဒီးသိၣ်လိသီလိကမျၢၢ်တဖၣ်လီၤ.’ တၢ်မၢဖိတဖၣ် ဘၣ်တၢ်ဖီၣ်န့ၢ်ကဒီးအဝဲသ့ၣ် ဒီးဘၣ်တၢ်ဆှၢထီၣ်အဝဲသ့ၣ်လၢ ပှၤယူဒၤဖိအရူလၢအဒိၣ်ကတၢၢ်အပူၤလီၤ. ပှၤလုၢ်တၢ်အခိၣ်တဲဝဲလၢ– ‘သုတဘၣ်တဲ ယ့ၣ်ၡူးအဂ့ၢ်တဂ့ၤန့ၣ် ပတဲသုဝံၤလံဒၢး.’ ဘၣ်ဆၣ် စီၤပ့းတရူးတဲဆၢက့ၤဝဲလၢ– ‘ပဘၣ်ဒိကနၣ် ယွၤအကလုၢ်အါန့ၢ်ဒံး ပဒိကနၣ်ပှၤကညီလီၤ.’
တၢ်ဘူၣ်တၢ်ဘါခိၣ်နၢ်တဖၣ် သးပှံၢ်ထီၣ်တၢ်ဒိၣ်မး အဃိအဝဲသ့ၣ် အဲၣ်ဒိးမၤသံတၢ်မၢဖိတဖၣ်လီၤ. ဘၣ်ဆၣ် ပှၤဖၤရံၤၡဲတဂၤလၢအမံၤမ့ၢ်ဝဲ စီၤကမၤလ့လးန့ၣ် ဂဲၤဆၢထၢၣ်ဒီးတဲဝဲလၢ– ‘ပလီၢ်သုသးသၢၣ်. ဘၣ်သ့ၣ်သ့ၣ် ကစၢ်ယွၤအိၣ်ဒီးပိာ်ခွါတဖၣ်အံၤလီၤ. မ့ၢ်သုဒုးတၢ်ဒီးယွၤကဘူၣ်ဧါ.’ တၢ်ဘူၣ်တၢ်ဘါခိၣ်နၢ်တဖၣ်န့ၣ် ဒိကနၣ်ဝဲအကလုၢ်လီၤ. ဖဲပှၤတီၢ်တၢ်မၢဖိတဖၣ်လၢ နီၣ်တီၢ်ဝံၤအလီၢ်ခံ တၢ်ဘူၣ်တၢ်ဘါခိၣ်နၢ် မၤလိာ်ကဒီးအဝဲသ့ၣ်လၢ သုတဘၣ်ဟးစံၣ်တဲၤတဲလီၤတၢ်လၢၤတဂ့ၤ ဝံၤဒီးပျဲက့ၤအဝဲသ့ၣ်လီၤ. ဘၣ်ဆၣ် တၢ်မၢဖိတဖၣ် ဆဲးစံၣ်တဲၤတဲလီၤတၢ်လီၤ. အဝဲသ့ၣ် ပာ်ဖျါထီၣ်တၢ်သးဒူ ဒီးစံၣ်တဲၤတဲလီၤဝဲတၢ်သးခုကစီၣ် လၢတၢ်လုၢ်ဟံၣ်ဒီး တဟံၣ်ဘၣ်တဟံၣ်လီၤ.
“ပဘၣ်စူၢ်ယွၤအါန့ၢ် ပစူၢ်ပှၤကညီ” လီၤ.—မၤတၢ် ၅:၂၉
တၢ်ဂ့ၤအဂၤလၢ နကဘၣ်သး
လံာ်စီဆှံအံၤ အတၢ်ကစီၣ် မ့ၢ်မနုၤလဲၣ်
တၢ်မၢဖိတဖၣ် စံၣ်တဲၤတဲလီၤတၢ်လၢ တၢ်သးဒူအပူၤ
ဖဲဘူၣ်ယဲၢ်ဆံအနံၤန့ၣ် တၢ်မနုၤဟဲကဲထီၣ်အသးလဲၣ်. ဖဲယ့ၣ်ၡူးအပျဲၢ်အဘီၣ်တဖၣ် စံၣ်တဲၤတဲလီၤတၢ်အခါန့ၣ် ဒုၣ်ဒါတဖၣ် မၤဆၢက့ၤအဝဲသ့ၣ်ဒ်လဲၣ်
