Muuna yanaasa koni kuzamaya naainanga kwa munyako wa tempele zazi ni zazi inze akupelela. Zazi leliñwi musihali, abona Pitrosi ni Joani inze baya kwa tempele. Kihaa li ku bona: ‘Shangwe nakupa munife kwateñi nto yeñwi.’ Pitrosi kihaa li: ‘Nika kufa nto ya butokwa yefita masheleñi. Ka libizo la Jesu, yema mi uzamaye!’ Pitrosi amutusa kuyema mi muuna yo akalisa kuzamaya! Sicaba nesi tabile hahulu kabakala makazo yeo, mi batu babañata baba balumeli.

Kono baprisita ni Basaduki nebanyemile. Baswala baapositola, mi babaisa kwa kuta ni kubabuza kuli: ‘Ki mañi yamifile maata a kufolisa muuna yo?’ Pitrosi aalaba kuli: ‘Neluamuhezi maata kuzwelela ku Jesu Kreste, yene mubulaile.’ Babahulu ba bulapeli bahuwa kuli: ‘Mutuhele kubulela ka za Jesu!’ Kono baapositola baalaba kuli: ‘Luswanela kubulela ka za hae. Haluna kutuhela.’

Pitrosi ni Joani hase balukuluzwi, honafo feela baya kwa balutiwa babañwi ni kuyo babulelela zeneezahalile. Balapela hamoho, mi bakupa Jehova bali: ‘Shangwe ulutuse kuba ni bundume ilikuli luzwelepili kueza musebezi wahao.’ Jehova abafa moya wahae okenile, mi bazwelapili kukutaza ni kufolisa batu. Batu babañata-ñata baba balumeli. Basaduki nebautwa muna kuli mane batama baapositola ni kubakwalela mwa tolongo. Kono fahalaa busihu, Jehova aluma lingeloi, ili lene likwahuluzi minyako ya tolongo ni kubulelela baapositola kuli: ‘Mukutele kwa tempele, mi muyo luta batu.’

Habusa kakusasana, kuta ya Sanhedrini, yona kuta ya baeteleli ba bulapeli, batalusezwa kuli: ‘Tolongo isapakilwe, kono baana bane mutamile baile! Bainzi mwa tempele, inze baluta batu!’ Baapositola batamiwa hape mi batiswa kwa Sanhedrini. Muprisita yomuhulu  ali ku bona: ‘Lumilaezi kusa bulela ka za Jesu!’ Kono Pitrosi aalaba kuli: “Lulukela kuutwa Mulimu sina mubusi kufita batu.”

Baeteleli ba bulapeli nebanyemile hahulu kuli mane nebabata kubulaya baapositola. Kono mufalisi yanaabizwa Gamaliele ayema ni kubulela kuli: ‘Mutokomele! Mwendi Mulimu uinzi ni bona. Kana luli mubata kulwanisa Mulimu?’ Baamuhela kelezo yahae. Hase bashapile baapositola ka litupa, babalaela hape kutuhela kukutaza, mi hasamulaho babalukulula kuli baye. Kono nebasika tuhela kukutaza kabakala taba yeo. Nebazwezipili kukutaza taba yende ka bundume, mwa tempele ni fa ndu ni ndu.