Muntu mukuabu uvua kayi mua kuenda uvua usomba dituku dionso ku tshiibi tshia ku ntempelo bua kulomba ka pa luse. Dimue dituku wakamona Petelo ne Yone babuela mu ntempelo. Wakabambila ne: ‘Ngambuluishayi koku.’ Petelo kumuambilaye ne: ‘Ndi ne tshintu tshitambe buimpe kupita makuta tshindi mua kukupesha. Mu dîna dia Yezu, juka wende!’ Pashishe Petelo wakamukuata, kutuadijaye kuenda! Bantu bakasanka bikole bua tshishima etshi, kuenzabi bua ba bungi balue bena kuitabuja.

Kadi bakuidi ne Basadoke bakafiika munda. Kukuatabu bapostolo kuyabu nabu ku kabadi, kubebejabu ne: ‘Nnganyi udi munupeshe bukole bua kuondopa muntu eu?’ Petelo wakabambila ne: ‘Tudi bapetele bukole kudi Yezu Kristo unuvua bashipe au.’ Bamfumu ba bitendelelu bakabakanyina ne: ‘Kanuakudi kabidi bua Yezu au to!’ Kadi bapostolo bakabambila ne: ‘Tudi ne bua kuakula bualu buende. Katuakulekela to.’

Diakamue bobu bamane kulekela Petelo ne Yone, bakaya kudi bayidi bakuabu, kubambilabu tshivua tshienzeke. Bakasambila pamue balomba Yehowa ne: ‘Tuambuluisha koku tuikale ne dikima bua tutungunuke ne kuenza mudimu webe.’ Yehowa wakabapesha nyuma wende muimpe, kutungunukabu ne kuyisha ne kuondopa babedi. Bantu ba bungi menemene bakalua bena kuitabuja. Basadoke bakumvua mukawu, kukuatabu bapostolo ne kubelabu mu buloko. Kadi Yehowa wakatuma muanjelu wende butuku, yeye kukangula biibi bia buloko, kuambilaye bapostolo ne: ‘Pinganayi mu ntempelo, nulongeshamu.’

Patshiatshia dituku diakalonda, bakambila bena ku Tshilumbuluidi tshinene, mmumue ne: kabadi ka bamfumu ba bitendelelu ne: ‘Tshiibi tshia buloko tshidi anu tshikanga, kadi bantu banuvua bakuate mbanyeme! Badi mu ntempelo balongesha bantu!’ Bakakuata  kabidi bapostolo, kuyabu nabu ku Tshilumbuluidi tshinene. Muakuidi munene wakamba ne: ‘Si tuvua banukandike bua kanuakudi bualu bua Yezu!’ Kadi Petelo wakamuandamuna ne: “Tudi ne bua kutumikila Nzambi bu mfumu pamutu pa kutumikila bantu.”

Bamfumu ba bitendelelu bakafiika munda bikole bajinga bua kushipa bapostolo. Kadi Mufalese mukuabu diende Gamaliele wakimana, kubambilaye ne: ‘Nudimuke! Nzambi udi mua kuikala ne bantu aba. Nudi nujinga kuluisha Nzambi anyi?’ Bakalonda mubelu wende. Bobu bamane kututa bapostolo mfimbu, bakabakandika kabidi bua kabayishi, kubalekelabu. Kadi bapostolo kabakalekela kuyisha to. Bakatungunuka ne kuyisha lumu luimpe ne dikima dionso mu ntempelo ne ku nzubu ne ku nzubu.