Attoq jun xinaq mintiʼtoq in bʼant tbʼet in kubʼ qeʼ tkyaqil qʼij qanil tkotz ttzi tja Dios. Toj jun qale ok tkeʼyin Pedro ex Juan toj tja Dios, ex xi tqʼamaʼn jlu kye: «Kynajsame, kyqʼontze jun tiʼ weye». Xi ttzaqʼweʼn Pedro te: «Jaku txi nqʼoʼne jun tiʼ teya aju mas tbʼanel twitz pwaq. Toj tbʼi Jesús, ¡weʼktza ex bʼeta!». Onin Pedro tiʼj tuʼn tjaw weʼ, ex ok ten xinaq bʼetil. Nimxix e jaw tzalaj xjal tiʼj milagr lu ex tuʼn jlu nim xjal okslan.

Pero tzaj nim kyqʼoj qe pal ex qe saduceo. E tzyet qe apóstol kyuʼn, ex i ex qʼiʼn kywitz nejenel kye okslal ex xi qanin jlu kye: «¿Alkye saj qʼonte kyipumale tuʼn tqʼanit xinaq lu?». Xi ttzaqʼweʼn Pedro: «Ma tzaj qʼoʼn qipumale tuʼn Jesús aju xinaq kubʼ kybʼyoʼne». Xi kyẍchʼiʼn qe nejenel kye okslal jlu kye: «¡Miʼn che yoline tiʼj Jesús!». Xi kyqʼamaʼn apóstol: «Il tiʼj tuʼn qyoline tiʼj. Kukx qo yolile».

Xitzun kytzaqpiʼn Pedro ex Juan, ex jun rat i eʼx qʼamalte kye txqantl t-xnaqʼtzbʼen Jesús aju otoq bʼaj. Kykyaqil junx e naʼn Dios te Jehová: «Najsama, qo tonintza tuʼn tten qipumale tuʼn kukx qyoline tiʼj tbʼiya». Xi tqʼoʼn Jehová xewbʼaj xjan kye ex iktzun tten kukx e pakbʼan ex e qʼanit xjal kyuʼn. Kukxtoq in che okslan xjal. Tzaj nim kyqʼoj saduceo ex e okx kyqʼoʼn qe apóstol toj cárcel. Noqtzun tuʼnj, tojx qonikʼen aju tzaj tsamaʼn Jehová jun t-anjel aju jaqet cárcel tuʼn ex xi tqʼamaʼn kye apóstol: «Kyxiʼye juntl maj toj tja Dios ex che pakbʼane atz».

Te qlax toj juntl qʼij, xiʼ jun xjal qʼamalte kye nejenel kye okslal: «¡Lamoʼn cárcel tukʼil tal, pero ya mintiʼ qe xjal e tzyet kyuʼne! ¡Lu qe ateʼ tuj tja Dios in che pakbʼan!». Tuʼntzunju e tzyet juntl maj qe apóstol ex i ex qʼiʼn kywitz nejenel kye okslabʼil. Xi tqʼamaʼn nejenel kye pal: «¡O txi qqʼoʼne orden kyeye tuʼn miʼn  kyyolintle tiʼj Jesús!». Xi ttzaqʼweʼn Pedro jlu kye: «Tnejel ilxix tiʼj tuʼn t-xi qnimane Dios, ex nya qe xjal».

Tzaj nimxix kyqʼoj qe nejenel kye okslabʼil, tuʼntzunju kyajtoq tuʼn kykubʼ kybʼyoʼn qe apóstol. Jaw weʼ jun fariseo Gamaliel tbʼi ex tqʼama jlu: «¡Kyxqʼuqink kyibʼe! Bʼalo at Dios kyukʼil xjal lu. ¿Kyaje tuʼn kyok meltzʼaje tiʼj Dios?». Xi kybʼiʼn jlu. Tuʼntzunju i ex kytzaqpiʼn, noqtzun tuʼnj, tnejel e ok kykʼixbʼisaʼn tukʼil tzeʼ ex xi kyqʼamaʼn kye juntl maj tuʼn miʼn kypakbʼantl. Noqtzun tuʼnj, mintiʼ kyaj kytzaqpiʼn apóstol tuʼn kypakbʼan tuʼn jlu. Kukx e pakbʼan tukʼil kyipumal toj tja Dios ex kyoj qe ja.