Kwali umonsi atapitanga pa mulandu nu kulemala, wikalanga cila wanda pa mulyango wi tempele ala akulengelezya. Uwanda umwi kasanya, waweni Petulo na Yoani ala yakuya umwi tempele. Wayanenyile ati: ‘Napaapata nkulengako ulupiya.’ Lelo Petulo wamunenyile ati: ‘Nimakupeela cimwi icicizile na pa lupiya. Mwi zina lyakwe Yesu nkukuneena ukuti katuka!’ Lyene Petulo wamwazwilizye ukukatuka nupya umonsi wiyo watandike ukupita. Iumba lyali sana ni nsansa pa mulandu ni cizunguzyo cii nupya antu aingi yaataile.

Lelo ya simapepo na Asaduki yasosile. Yalemile atumwa nu kuyatwala uku cilye nupya yayuzizye iyati: ‘ A weni uwamipeela amaka akupozya umonsi wi? Petulo watiile: ‘Yesu Klistu wino mwakomile u watupeela amaka.’ Intunguluzi zya mapepo zyamukalipiile iziti: ‘Leka ukulanda pali Yesu!’ Lelo atumwa yalanzile iyati: ‘Tulinzile ukulanda pali aliwe. Nupya tutalaleka.’

Lino intunguluzi zyalesile ukuti Petulo na Yoani yapita, lilyo kwene sile yaile ku yasambi yauze nu kuyalondololwela ivyacitiike. Yapefile nu kulenga Yeova iyati: ‘Twapaapata twazwe ukuya akome pakuti tutwalilile ukuomba umulimo wako.’ Yeova wayapeezile umupasi wakwe uwa muzilo nupya yatwalilile ukusimikila nu kupozya. Antu aingi sana izile iyataila. Asaduki yaali sana nu uzuwa icakuti yalemile atumwa nu kuika umu cifungo. Nomba usiku, Yeova watumile malaika wakwe uwaile ayula ivisaasa vya cifungo nu kuneena atumwa ati: ‘Swililini ukwi tempele umu kusambilizya.’

Wanda uwalondelilepo katondo, aa mu cilye ca Sanihedilini, ni ntunguluzi zya mapepo yazinenyile ati: ‘Cifungo cicili iciyalwe, nomba aonsi yano mwanyefile yasimo! Yali umwi tempele yakusambilizya  antu!’ Nupya kwene atumwa yayalemile nu kuyatwala uku cilye ca Sanihedilini. Simapepo mukalamba walanzile ati: ‘Twamilesizye ukulanda pali Yesu!’ Nomba Petulo walanzile ati: “Tufwile ukuvwila Leza ukucila ukuvwila antu.”

Intunguluzi zya mapepo zyasosile sana icakuti zyalondanga nu kukoma atumwa. Lelo Umufaliseo uwi zina lyakuti Gamalieli wakatwike nu kulanda ati: ‘Cenjelini! Leza afwile aakuomvya aonsi yaa. Uzye icumi mukulonda mwalwisyanya na Leza?’ Yuvwile vino walanzile. Pa cisila ca kuma atumwa ivikoti. nupya kwene yayanenyile ukuti yate ukusimikila, lyene yayalesile ukuti yapita. Nanti ciye vivyo atumwa yatatiile. Yatwalilile ukuya asipe lino yakusimikila ilyasi lisuma, mwi tempele nu ku ng’anda ni ng’anda.