Iin ta̱a ta̱ va̱ása kívi kaka xi̱ndukúra xu̱ʼún ndiʼi ki̱vi̱ chí yéʼé ña̱ templo. Iin ki̱vi̱ tá xa̱a̱ ku̱a̱ʼa̱n kúna̱a xi̱nira ki̱xa̱a̱ ta̱ Pedro xíʼin ta̱ Juan chí templo ta ni̱ka̱ʼa̱nra xíʼinna: “Taxindó xu̱ʼún ndaʼíi̱”. Ta̱ Pedro ni̱ka̱ʼa̱nra xíʼinra: “Íyo iin ña̱ʼa ña̱ va̱ʼaníka nu̱ú xu̱ʼún kuchiñu taxii̱ ndaʼún. Xíʼin ki̱vi̱ ta̱ Jesús káʼi̱n xíʼún kundichi ta kúaʼan”. Tasaá ta̱ Pedro chi̱ndeé táʼanra xíʼinra ña̱ nda̱kundichira, ta ki̱xaʼá ta̱ ta̱a yóʼo xíkara. Na̱ yiví ni̱kusi̱íkaví-inina tá xi̱nina milagro yóʼo ta ki̱xaʼána kándíxana ta̱ Jesús.

Soo na̱ su̱tu̱ xíʼin na̱ saduceo ni̱sa̱a̱nína. Ti̱inna na̱ apóstol ta ku̱a̱ʼa̱nna xíʼinna nu̱ú ndátaka na̱ su̱tu̱ ña̱ tíinna ku̱a̱chi, ña̱ xi̱naní Sanedrín, ta ni̱nda̱ka̱tu̱ʼunnana: “¿Ndáana ta̱xi ndée ndaʼa̱ndó ña̱ sa̱ndáʼandó ta̱ ta̱a yóʼo?”. Ta̱ Pedro ni̱ka̱ʼa̱nra: “Ta̱ Jesús ta̱ xa̱ʼníndó ta̱xi ndée ndaʼa̱ndi̱”. Na̱ su̱tu̱ ni̱sa̱a̱nína ta ni̱ka̱ʼa̱nna: “Kǒo natúʼunkandó xa̱ʼa ta̱ Jesús”. Na̱ apóstol ni̱ka̱ʼa̱nna: “Va̱ása sandákoondi̱ ña̱ natúʼunndi̱ xa̱ʼara”.

Tasaá sa̱ñána ta̱ Pedro xíʼin ta̱ Juan, ta ndi̱ku̱n kama ni̱xa̱ʼa̱nna na̱túʼunna xíʼin na̱ inkaka apóstol xa̱ʼa ña̱ ndo̱ʼona. Ndiʼina ni̱ka̱ʼa̱n xíʼin Jehová: “Chindeé ndi̱ʼi̱ ña̱ ndakú koo inindi̱ ña̱ natúʼunkandi̱ xíʼin na̱ yiví xa̱ʼún”. Jehová ta̱xira espíritu santo ndaʼa̱na, tasaá na̱túʼunna xa̱ʼara ta sa̱ndáʼana na̱ kúúmií kue̱ʼe̱. Ku̱a̱ʼáníka na̱ yiví ka̱ndíxa ta̱ Jesús. Na̱ saduceo ni̱sa̱a̱-inina xi̱nina na̱ apóstol ta nda̱a̱ chi̱ka̱a̱nana veʼeka̱a. Soo mií ñu̱ú saa, Jehová chi̱ndaʼára iin ángel ña̱ xu̱nára yéʼé veʼeka̱a nu̱úna ta ni̱ka̱ʼa̱nra xíʼinna: “Kúaʼanndó chí templo ta sanáʼa̱ndó na̱ yiví xa̱ʼa Ndióxi̱”.

Tá xi̱ta̱an ña̱ inka ki̱vi̱, iinna ni̱xa̱ʼa̱n ni̱ka̱ʼa̱n xíʼin na̱ su̱tu̱: “Ndásiva yéʼé veʼeka̱a soo kǒo na̱ ta̱a na̱ chi̱ka̱a̱ndó iniña. Chí templova xíkana sánáʼa̱na xa̱ʼa Ndióxi̱”. Ta tuku ti̱inna na̱ apóstol ku̱a̱ʼa̱n xíʼinna nu̱ú  tíinna ku̱a̱chi. Ta̱ su̱tu̱ káʼnu ni̱ka̱ʼa̱nra xíʼinna: “Xa̱a̱ ni̱ka̱ʼa̱nndi̱ xíʼinndó ña̱ kǒo sánáʼa̱kandó xa̱ʼa ta̱ Jesús”. Ta̱ Pedro ni̱ka̱ʼa̱nra: “Siʼnaka ña̱ káʼa̱n Ndióxi̱ xíniñúʼu kuniso̱ʼondi̱ su̱víka ña̱ káʼa̱n ndóʼó”.

Na̱ su̱tu̱ ni̱sa̱a̱nína ta nda̱a̱ kúni̱na kaʼnína na̱ apóstol. Tasaá iin ta̱ fariseo ta̱ naní Gamaliel nda̱kundichira ta ni̱ka̱ʼa̱nra: “Kuentaní koondó. Chi sana Ndióxi̱va kúú ta chi̱ndaʼá na̱ ta̱a yóʼo. ¿Á ndixa kúni̱ndó kanitáʼanndó xíʼin Ndióxi̱?”. Xi̱niso̱ʼovana ña̱ ni̱ka̱ʼa̱n ta̱yóʼo. Sa̱ñána na̱ apóstol, soo siʼna ka̱ninana ta tuku ni̱ka̱ʼa̱nna xíʼinna ña̱ ná kǒo natúʼunkana xa̱ʼa Jesús. Soo va̱ása nísandákoo na̱ apóstol ña̱ natúʼunna xa̱ʼa ta̱ Jesús. Chi̱ka̱a̱na ndeé ña̱ na̱túʼunna xa̱ʼara chí templo xíʼin veʼe tá veʼe.