Se tlakatl katli amo ueliyaya nejnemi mojmostla moseuiyaya kampa puerta ipan teokali uan tlajtlaniyaya tomij. Se tonali ika tiotlak kinitak Pedro uan Juan asitoj ipan teokali, uan kiniljuik: “Xinechmakakaj tomij”. Pedro kinankilik: “Nimitsmakas tlen tlauel ipati uan amo kej tomij. Ika Jesús itoka, ¡ximoketsa uan xinejnemi!”. Uajka Pedro kipaleuik ma moketsa uan pejki nejnemi. Maseualmej tlauel yolpajkej kema kiitakej tlen panok, yeka miakej mochijkej Cristo itokilijkauaj.

Sacerdotes uan saduceos tlauel kualankej. Kinitskijkej apóstoles uan kinuikakej kampa mosentiliyayaj nopa tlayakananij judíos, tlen kitokaxtiyayaj Sanedrín, uan kintlajtlanijkej: “¿Ajkia inmechmakak chikaualistli uan yeka inkichikajkej ni tlakatl?”. Pedro kinnankilik: “Ni chikaualistli techmakak Jesucristo katli inmojuantij inkimiktijkej”. Nopa tlayakananij chikauak kiniljuijkej: “¡Ayokmo xitlamachtikaj tlen Jesús!”. Nopa apóstoles tlanankilijkej: “Moneki titlamachtisej tlen ya uan amo aka techtsakuilis”.

Pedro uan Juan kinkauilijkej ma yakaj, uan nimantsi kinpouilitoj nopa sekinok tlaneltokanij tlen panotoya. Sansejko momaijtojkej uan kiiljuijkej Jehová: “Xitechpaleui amo ma timajmauikaj uan kiampa nojua titlajtolmoyauasej”. Jehová kinmakak itonal uan kiampa nojua tlajtolmoyajkej uan techikajkej. Tlauel miakej pejkej tlaneltokaj. Nopa saduceos tlauel kinkualankaitayayaj apóstoles, yeka kinitskijkej uan kintsajkej. Nopa youali Jehová kititlanki se iluikaejketl katli kitlapok nopa tlatsaktli, uan kiniljuik apóstoles: “Sampa xiakaj ipan teokali uan xitlamachtikaj”.

Ualmostla, kiniljuitoj katli itstoyaj ipan Sanedrín: “¡Maske nopa tlatsaktli kuali tsaktok ika llave, nopa tlakamej ayokmo itstokej nopaya! ¡Inijuantij tlamachtiaj ipan teokali!”.  Yeka nojua kinitskijkej uan kinuikakej kampa Sanedrín. Nopa sumo sacerdote kiniljuik: “¡Tiinmechiljuijkej ayokmo xitlamachtikaj tlen Jesús!”. Pedro kinnankilik: “Moneki tijneltokasej achtoui toTeko uan amo maseualmej”.

Tlayakananij tlauel kualantoyaj yeka kinekiyayaj kinmiktisej nopa apóstoles. Uajka se fariseo katli itoka Gamaliel moketski uan kiijtok: “¡Kuali ximoiljuikaj tlen inkichiuaj! Uelis toTeotsij kinpaleuia ni tlakamej. ¿Inkinekij inkitsakuilisej toTeotsij?”. Inijuantij kitlakakilijkej Gamaliel. Maske kinkauilijkej ma yakaj, achtoui kinuijuitejkej uan kinnauatijkej ayokmo ma tlajtolmoyauakaj. Nopa amo kintsakuilik apóstoles uan nojua tlajtolmoyajkej ipan teokali uan kajkalpa.