Se takat akin amo uelia nejnemia mojmostaj motaliaya ikalakyan templo uan tajtania tomin. Se tiotak, kinitak Pedro uan Juan ajsitiyayaj itech templo uan kiniluij: “Ika kualtakayot, xinechmakakan teisa”. Pedro kinankilij: “Uelis nimitsmakas se taman tein okachi kuali ke tomin. Itokaykopa Jesús, ¡ximoketsa uan xinejnemi!”. Ompa Pedro kipaleuij maj moketsa, uan takat peuak nejnemi. Taltikpakneminij tel yolpakkej keman kiitakej nejin uan miakej mochiujkej itatojtokakauan Cristo.

Sayoj ke tiopixkamej uan saduceos tel kualankej. Kinkitskijkej tatitanilmej, kinuikakej ininixpan taixyekananij itech taneltokalis akin pouiaj itech Sanedrín, uan kintajtanijkej: “¿Akoni namechmakak chikaualis tein ika nankipajtijkej nejon takat?”. Pedro kinnankilij: “Chikaualis techmakak Jesucristo, takat akin namejuan nankimiktijkej”. Nejon taixyekananij kintsajtsilijkej: “¡Amo ika xitajtokanok Jesús!”. Pedro uan Juan kijtojkej: “Moneki ika titajtoskej. Amo timotentsakuaskej”.

Ompa kinkaujkej maj yakan, uan yejuan niman kintapouitoj okseki imomachtijkauan Jesús tein panoka. Nochin kitataujtijkej Jiova: “Ika kualtakayot, xitechpaleui maj tikpiakan yolchikaualis uan ijkon uelis tiksentokaskej moka titajtoskej”. Jiova kinmakak yektikatsin espíritu, tein kinpaleuij maj kisentokanij tanojnotsanij uan tapajtianij. Okachi taltikpakneminij mochiuayaj itatojtokakauan Cristo. Kemej saduceos semi kinnexikoluiayaj tatitanilmej, kintsakkej. Sayoj ke nejon youak, Jiova kititanik se ángel akin kintatapouilij uan kiniluij: “Oksepa xiyakan templo uan ompa xitanojnotsakan”.

Mostika kualkan, aksa kiniluito akin pouiaj itech Sanedrín: “¡Kampa nankintsakkej takamej tatsaktok, sayoj ke yejuan amo ompa yetokej! ¡Tanojnotstokej itech templo!”. Yejua ika oksepa kinkitskijkej tatitanilmej uan kinuikakej ininixpan akin pouiaj itech Sanedrín.  Akin kinixyekanaya tiopixkamej kiniluij: “¡Tamechnauatijkejya ke amo ika xitajtokanok Jesús!”. Pedro tanankilij: “Moneki tiktakamatiskej Dios kemej taixyekankej uan amo takamej”.

Taixyekananij tel kualantoyaj uan kinekiaj kinmiktiskej tatitanilmej. Sayoj ke se fariseo akin monotsaya Gamaliel moketsak uan kijtoj: “¡Kuali xiknemilikan! Xa Dios iniuan yetok nejin takamej. ¿Yekmelauj nankinekij nankiixnamikiskej Dios?”. Yejuan kitajtolkakkej. Kinkaujkej maj yakan, maski achto kinuijuitekkej uan oksepa kinnauatijkej maj amo tanojnotsanijok. Sayoj ke nejon amo kintsakuilij. Itech templo uan kajkalpan kisentokayaj tanojnotsayaj ika yolchikaualis.