Umwe mwanarume wainga acingakwanisi kufamba, waigara pa musuvo po temberi njiku jese ecipembha. Njiku imweni no masikati, wakavona Pedru na Johani vecinghwina mu temberi. Iyena wakati: ‘Ndapota mungandipavo ciri cese.’ Pedru wakapingura kuti: ‘Ndino ciro cinosisira maningi kuti ndikupekeje kupinda mare. Ngo zina ra Jesu Kristu, mukai ufambe!’ Pedru wakamumusa zve mwanarumewo wakatanga kufamba. Vandhu vainga pondhopo vakadakara maningi zvokuti vazinji vavo vakava vatendi.

Asi vapiri no vaSadhuki vakanyangajwa. Vakabata vapostori, vovaendesa ku dare ro Sinedhirio zve vakati: ‘Ndiani wakamupa simba rokurapa mwanarume uu?’ Pedru wakati: ‘Ndi Jesu Kristu, wamakauraya.’ Vatungamiriri vo zviara vakamima veciti: ‘Mucabhuya ngo zva Jesu!’ Asi vapostori vakati: ‘Tinodikana kubhuya ngo pamusoro pake. Itusu atizoregeri.’

Pedru na Johani pavakasujunuhwa, vakaenda ngo kukasika kuno vajiji vamweni zve vovabvunja zvainga zvaitika. Ivona vakaita mukumbiro kuna Jehovha vari vese, veciti: ‘Tapota tipenyivo cicunge kuti tikwanise kuita basa renyu.’ Jehovha wakavapa mujimu mucena zve ivona vakaenderera mbheri vacicumaera no kurapa vanohwaja. Vandhu vakawanda vakava vatendi. VaSadhuki vakaita thima zvokuti vakatora vapostori vovaendesa mu kadheya. Asi co usiku, Jehovha wakatumira ngirozi yofunungura musuvo wo mukadheya zve yakati kuno vapostori: ‘Hwiriranyi ku temberi, kojijisa.’

Mangwanani akatevera, dare ro Sinedhirio, rakabvunjwa kuti: ‘Kadheya yakafungwa, asi vanarume vamakasunga vapinda! Ivona vari mu temberi, vecijijisa vandhu!’ Vapostori vakasungwazve voendeswa ku Sinedhirio. Mupiri mukuru wakati: ‘Ndakamubvunja kuti muregere kubhuya ngo zva Jesu!’ Asi Pedru wakati: ‘Tinodikana kuzwira Mwari inga mutongi kupinda Vandhu.’

 Vatungamiriri vo zviara vakanyangajwa maningi zvokuti vakaguma pakuda kuuraya vapostori. Asi umwe muFarisi waidanijwa Gamarieri wakamuka wonanga kuti: ‘Basopanyi! Zvingaita kuti Mwari ari ku divi ravo. Munoda kuhwa na Mwari?’ Ivona vakaita zvavakabvunjwa. Pakupera kurova vapostori ngo mushakwe, vakavabvunja kuti varegere kucumaera, perapo vakavasia voenda. Asi izvo, azvizivi kuimisa vapostori. Ivona vakaenderera mberi vecicumaera masoko akanaka ngo cicunge, mu temberi no nyumba ngo nyumba.