Esiku kehe pomweelo gwotempeli opwa li hapu kala omulumentu gumwe oshilema ta hehela aantu. Esiku limwe omutenya, okwa mono Petrus naJohannes taya yi motempeli. Okwa ti kuyo: ‘Alikana, pii ndje sha.’ Petrus okwa ti: ‘Otandi ku pe sha shoka shi na ondilo yi vule yiimaliwa. Medhina lyaJesus, otandi ku lombwele: thikama, ngoye wu ende!’ Opo ihe Petrus okwe mu kwathele a thikame, nomulumentu okwa tameke okweenda. Aantu oya li ya kuminwa noonkondo oshikumithalonga shika, nomolwaashoka oyendji ya ningi ooitaali.

Aayambi nAasadukayi oya li ya geya. Oya kwata po aayapostoli, e taye ya fala kompangu. Oya pula aayapostoli ya ti: ‘Olye e mu pe oonkondo dhokwaaludha omulumentu nguka?’ Petrus okwa ti: ‘Otwa pewa oonkondo kuJesus Kristus ngoka mwa dhipaga.’ Aawiliki yelongelokalunga lyOshijuda oya lombwele aayapostoli ya ti: ‘Inamu popya we kombinga yaJesus.’ Ihe aayapostoli oya ti: ‘Otu na okupopya kombinga ye. Itatu etha po oku shi ninga.’

Sho Petrus naJohannes ye ethiwa, oya shuna mbalambala kaalongwa ooyakwawo noye ya hokololele ashihe shoka sha ningwa po. Oya galikana pamwe, taya pula Jehova taya ti: ‘Tu kwathela tu kale aalaadhi, opo tu tsikile niilonga yoye.’ Jehova okwe ya pe ombepo ondjapuki, e taya tsikile okuuvitha nokwaaludha aantu. Aantu oyendji oya ningi ooitaali. Aasadukayi oya li ya sa efupa e taya kwata po aayapostoli noye ya tula mondholongo. Ihe uusiku Jehova okwa tumu omuyengeli ngoka e egulula omiyelo dhondholongo e ta pititha mo aayapostoli. Omuyengeli okwe ya lombwele a ti: ‘Shuneni kotempeli, e tamu longo aantu.’

Ongula yesiku lya landula ko, aalangeli oya lombwele oshigongi shaatokoli taya ti: ‘Ondholongo natango oye edhila, ihe aalumentu mboka ya li mo kaye mo.’ Gumwe okwa ti: ‘Oye li motempeli taya longo aantu.’ Aayapostoli oya kwatwa po ishewe  e taya falwa koshigongi shaatokoli. Omuyambi omukuluntu okwa ti: ‘Otwe mu lombwele mwaa popye we kombinga yaJesus.’ Ihe Petrus okwa yamukula a ti: “Otse otu na okuvulika kuKalunga, hakaantu.”

Aawiliki yelongelokalunga oya li ya geya noonkondo noya li ya hala okudhipaga aayapostoli. Ihe Omufarisayi gwedhina Gamaliel okwa thikama mokati kawo, e ta ti: ‘Kaleni mwa kotoka! Otashi vulika Kalunga e li pamwe naalumentu mbaka. Omwa hala okukondjitha Kalunga?’ Oya taamba ko epukululo lye kaaye ya dhipage. Konima yokudhenga aayapostoli noongola, oye ya lombwele natango ye ethe po okuuvitha noye ya etha ya ye. Ihe aayapostoli inaye etha po okuuvitha. Oya tsikile okuuvitha nuulaadhi onkundana ombwanawa motempeli nosho wo egumbo negumbo.