So samösa ndra matua sangandrö-ngandrö kefe ero maʼökhö ba mbawandruhö gosali. Tebai mofanö ndra matua daʼö. Samuza maʼökhö me tanö owi, iʼila me möi bakha ba gosali Wetero faoma Yohane. Iʼandrö khöra gefe. Imane Fetero, ’Tola ubeʼe khöu zabölö sökhi moroi ba gefe. Ba döi Yesu, ozizio ba ofanö!’ Aefa daʼö, itolo ia Fetero ba wezizio ba ibörögö mofanö ia! Omuso dödö niha sangila tandra sahöli-höli dödö andrö ba daʼö, irege ato zi faduhu tödö khö Yesu.

Mofönu sibai ndra ere hegöi ira Sadukaiʼo. Laraʼu ndra sinenge andrö ba laʼohe ba gödo zanguhuku. Manofu ira, ’Haniha zameʼe khömi faʼabölö ba wamadöhö ira matua daʼa?’ Imane Fetero, ’Moroi khö Yesu Keriso nibunumi, ba daʼö matema waʼabölö.’ Muʼao ndra sondröniaʼö ba agama, ’Böi midunö-dunö sanandrösa khö Yesu saʼae!’ Hizaʼi, lamane ira sinenge, ’Hasambalö mafatunö sanandrösa khönia. Lö maböhöli.’

Me no laʼefasi ira, lafalukhaisi nifahaʼö tanö böʼö ira Fetero faoma Yohane ba lafatunö hadia zalua. Mangandrö ira khö Yehowa, ’Tolo ndraʼaga faböi ataʼu enaʼö lö maböhöli wamalua halöwö daʼa.’ Ibeʼe khöra waʼabölö gehehania Yehowa ba lö laböhöli wanuriaigö turia somuso dödö aefa daʼö lafadöhö niha. Itugu ato niha si faduhu tödö khö Yesu. Afökhö sibai dödö ndra Sadukaiʼo irege labeʼe ba gurunga ndra sinenge. Hizaʼi ba zi bongi daʼö, ifatenge malaʼikania Yehowa. Ibokai mbawandruhö gurunga malaʼika andrö ba imane, ’Miʼaeʼe ba gosali zui ba mifahaʼö niha ba daʼö.’

Sihulö wongi daʼö so zangombakha khö Zangetuʼö Huku, ’Lö si teboka gurunga. Hizaʼi, lö hadöi bakha niha niraʼumi andrö! Lafahaʼö niha ba gosali iadaʼa!’ Lafuli zui laraʼu ndra sinenge andrö ba laʼohe ira khö Zangetuʼö Huku.  Imane ere sebua, ’No mategu ami enaʼö böi midunö-dunö sanandrösa khö Yesu!’ Hizaʼi, imane Fetero, ”Abölö sökhi woloʼö khö Lowalangi me yaʼia zamatörö yaʼaga moroi ba woloʼö ba niha.”

Mofönu sibai zondröniaʼö ba agama irege omasi ira labunu ndra sinenge. Hizaʼi, imane Farizaiʼo sotöi Gamalieli, ’Miʼangelama! Te sindruhu wa Lowalangi zanolo yaʼira. Hadia omasi ami milawa Lowalangi?’ Laʼoʼö niwaʼönia. Me no aefa laböbözi ndra sinenge, lafuli zui lategu ira enaʼö lö laturiaigö duria somuso dödö. Aefa daʼö, laʼefasi ndra sinenge ba lö laböhöli wanuriaigö turia somuso dödö. Lafalua daʼö ba gosali hegöi ba nomo misa si fao faʼabarani.