Omulume umwe otyilema ankho apeho uvasiwa pombundi yondyuo ya Huku ononthiki ambuho komuhuka. Nthiki imwe komuhuka, wamona Petulu na João vanyingila mondyuo ya Huku. Evepopila okuti: ‘Mbambavo mpheivo otyipuka tyimwe.’ Petulu ati: ‘Ame ndyina otyipuka tyimwe otyiwa vali tyipona onombongo, nahanda okukuavela. Menyina lia Jesus, katuka iya enda!’ Petulu emukuatesako okukatuka iya omulume oo ahimbika okueenda! Ovanthu avahuvu unene nehuviso olio iya ovanyingi avetavela ondaka ya Huku.

Ovanakwa no va Sanduseu avanumana unene. Avakuate ono apostolu, avevetuala kovatumini iya avevepopila okuti: ‘Olie wemuavela epondolo opo muhakule omulume ou?’ Petulu ati: ‘Onthue tuapewa epondolo na Jesus Kristu, una onwe muaipaa.’ Ononkhalamutwe mbonongeleya avati: ‘Yekeipo okupopia konthele ya Jesus!’ Mahi ono apostolu avati: ‘Onthue tuna okupopia konthele yae. Kamatutalama.’

Etyi Petulu na João vayovolwa, avaende kovalongwa vakuavo iya avevepopila etyi tyaenda-po. Aveho avelikuambela iya avaiti ku Jeova okuti: ‘Mbambavo tukuateseko opo tutyivile okutualako okulinga ovilinga viove.’ Jeova eveavela ospilitu sandu yae iya avatualako okuivisa nokulongesa. Ovanthu ovanyingi avetavela ondaka ya Huku. Ova Sanduseu avavete ono apostolu iya avevepake mokaleya. Kounthiki watyo, Jeova atumu oandyu, aiikula omapito okalavoso ine okaleya iya aivepopila okuti: ‘Kondokei kondyuo ya Huku ngako mukalongesa.’

Muhuka tyee, Mombonge onene yo va Judeu, ononkhalamutwe mbonongeleya avevepopila okuti: ‘Tuavasa okaleya kaikwa, mahi ovanthu ankho vapakua-mo vakahateka! Ankho vekahi mondyuo ya Huku nokulongesa ovanthu!’ Konyima, ono apostolu avakuatwa avatualwa Kombonge onene yo va Judeu. Omunene-nakwa evepopila okuti:  ‘Onthue tuemutuma opo muhapopie vali konthele ya Jesus!’ Mahi Petulu akumbulula okuti: “Tuna okutavela ku Huku tyipona ovanthu.”

Ononkhalamutwe mbonongeleya ambunumana unene iya avahande okuiipaa ono apostolu. Mahi omu Faliseu umwe utiwa o Gamaliyeli evepopila okuti: ‘Lungukei! Huku ukahi novalume ava. Okuti tyili-tyili, onwe muhanda umwe okuluisa Huku?’ Avetavela etyi evepopila. Etyi vamana okuveta ono apostolu novimuti, avevepopila vali opo vayeke-po okuivisa iya ono apostolu avaende. Mahi kavetyivilile okutalameka ono apostolu. Vatuaileko okuivisa onondaka onongwa nombili, tyilinge mondyuo ya Huku iya nokuivisa umbo na umbo.