Omushaija owaabaire atarikubaasa kugyenda akaba ashutama aha irembo rya hekalu kushabiiriza. Eihangwe rimwe, akareeba Petero na Yohaana barikuza omu hekalu. Akabagira ati: ‘Mumpe esente.’ Petero akamugira ati: ‘Niinza kukuha ekirikukira esente. Omu iziina rya Yesu, imuka ogyende.’ Petero akahwera omushaija, yaatandika kugyenda. Abantu bakashemererwa munonga ahabw’eky’okutangaaza ekyo kandi baingi bakaikiriza.

Kwonka abanyamurwa n’Abasadukaayo bakagira ekiniga. Bakakwata entumwa, baabatwara omu icwero ry’emanja, kandi baababuuza bati: ‘N’oha obahaire amaani g’okukiza omushaija ogu?’ Petero akabagira ati: ‘Tukatunga amaani kuruga ahari Yesu Kristo, ou mwaitsire.’ Abeebembezi b’ediini bakabaragiira bati: ‘Mutagaruka kugamba ahari Yesu.’ Kwonka entumwa bakagira bati: ‘Nitwija kumugambaho. Ti turaareke.’

Bwanyima Petero na Yohaana ku baabarekwire, ahonaaho bakashanga abeegi abandi baabagambira ebyabaireho. Bakashaba Yehova hamwe barikugira bati: ‘Tuhwere tugire obumanzi kugira ngu tubaase kugumizamu nitukora omurimo gwawe.’ Yehova akabaha omwoyo gurikwera, kandi bakagumizamu nibabuurira kandi barikutambira abantu. Abantu bakaguma nibabegaitaho omu kwikiriza. Abasadukaayo bakagira eihari ringi baakwata entumwa baabata omu kihome. Kwonka omu kiro, Yehova akoohereza maraika we, yaigura enyigi z’ekihome kandi yaagambira entumwa ati: ‘Mugarukye omuri hekalu, mwegyese.’

Akasheeshe akakuratsireho, ab’omu Ishengyero n’abeebembezi b’ediini, bakabagira bati: ‘Ekihome kikingire, kwonka abashaija tibarimu. Bari omu hekalu, nibeegyesa abantu.’ Ogundi omurundi, entumwa bakagaruka baakwatwa baatwarwa omu Ishengyero.  Omunyamurwa omukuru akabagira ati: ‘Tukabaragiira kutagaruka kugamba ahari Yesu.’ Kwonka Petero akamugarukamu ati: “Tushemereire kworobera Ruhanga okukira abantu.”

Abeebembezi b’ediini bakagira ekiniga kingi kandi bakaba nibenda kwita entumwa. Kwonka Omufarisaayo orikwetwa Gamalieli akeemerera kandi yaabagira ati: ‘Mwerinde. Ruhanga ashemereire kuba ari n’aba bashaija. Nimwenda kurwanisa Ruhanga?’ Bakaikiriza obuhabuzi obu yaabahaire. Bwanyima y’okuteera entumwa n’enkoni, bakagaruka baabaragiira omurundi ogundi kutagaruka kubuurira, baabareka bagyenda. Kwonka ekyo tikiraremiise entumwa. Bakagumizamu nibabuurira amakuru marungi n’obumanzi, omuri hekalu n’enju aha nju.