O vwo ọhworhare owu ro rhiẹ ukpolo rọ rẹ igho, o siyẹ anurẹsẹ oghwa ẹga na kẹdẹkẹdẹ. Erhẹrhuvo ẹdẹ owu, ọhworhare na nọ mẹrẹn i Peter ọrhẹ i John re riẹ oghwa ẹga na. Nọ ta rẹn aye: ‘Biko are i yẹ mẹ igho.’ Peter nọ ta riẹn: ‘Mi vwo oborẹ ọ ghwẹ igho mi na yọ. Uvuẹn odẹ i Jesu, vẹnrẹn ne wu nya!’ Omarana, Peter nọ ha userhumu riẹn vẹnrẹn, ọhworhare na nọ tuẹn onya rhọ! Oma ọ merhen otu na omamọ fọkiẹ igbevwunu ọnana te erhirhiẹ ihworho buebun e rhiẹ Ilele Kristi.

Ọrẹn, irherẹn na ọrhẹ otu i Sadducee ne biomevwan. Omarana, aye ni mwu inyikọ na riẹ ẹghware re guẹnzọn, aye ni nọrẹn aye: ‘Ọrọmo yọ yẹrẹ are omẹgbanhon are a sabu simi ọhworhare ọnana?’ Peter nọ tare: ‘Jesu Kristi rẹ are i kperi na, yọ yẹrẹ ame omẹgbanhon na.’ Ilori ẹga na ni van ghwu aye: ‘Are i vwa tẹmro kpahen i Jesu ghwomara-an.’ Ọrẹn, inyikọ na ni tare: ‘Ame ina vi tẹmro kpahiẹn. Ame i dobọjẹ-ẹ!’

Omarana, ogege re tiobọnẹ Peter ọrhẹ John hin, aye ni bru idibo ri hẹrhẹre na ya nẹ iyẹnrẹn rẹn aye. Aye ephian ni nẹrhomo vwe i Jehova, aye ni tare: ‘Biko yẹ ame uduefigbere neneyo ame i sabu rhe ghwoghwo.’ Jehova no tiobọnẹ ẹhẹn ọfuanfon na rẹn aye, aye ne ghini ghwoghwo jeghwai simi ihworho. Ihworho buebun ni me rhiẹ Ilele Kristi. Otu i Sadducee na, na rioma kpahen inyikọ na, aye ni mwu inyikọ na rhẹ ekanron. Ọrẹn, uvuẹn ason, Jehova no dje ọmakashe owu no yo je ighwe ekanron na, nọ ta rẹn inyikọ na: ‘Are i rharhumu riẹ oghwa ẹga na, ye yono ihworho.’

Urhiọke ẹdẹ ọreva ye, na ta rẹn ilori ẹga na uvuẹn ekete aye e guẹnzọn re se Sanhedrin: ‘A kanren ighwe ekanron na, ọrẹn, ehworhare na a ha uvuie-en! Aye e yono ihworho uvuẹn oghwa ẹga na!’ Omarana, na rharhumu mwu inyikọ na riẹ Sanhedrin na. Orherẹn ọduado na, nọ tare: ‘Ame i jurhi rẹn are taghene are i vwe ghwoghwo kpahen i Jesu-u!’ Ọmarana, Peter  nọ kpahenrhọ riẹn: “Ame ina vi huvwele Osolobrugwẹ taghene ọye yo suẹn ukperẹ ono rhiẹ ituakpọ.”

Ilori ẹga na, na tuekwẹre, aye na guọlọ kpe inyikọ na. Ọrẹn, onyẹ i Pharisee owu re se Gamaliel nọ tare: ‘Are i bibiesuọn! Ọnọ sabu rhirhiẹ taghene Osolobrugwẹ ọrhẹ ihworho enana i gba havwiẹ. Are i ghini guọlọ lele Osolobrugwẹ wọnrọn?’ Aye ni ha urhebro na ruiruo. Ọke aye a fa inyikọ na hin, aye ni jurhi taghene inyikọ na i dobọ aghwoghwo na ji, ọke oru, aye ni tiobọnu aye nẹ aye i nyarhẹn. Ọrẹn, ọrana ọ lẹrhẹ inyikọ na dobọji-i. Aye ne ghwoghwo iyẹnrẹn esiri na rhẹ uduefigbere uvuẹn oghwa ẹga na ọrhẹ nẹ oghwa riẹ oghwa.