Uj suchu runaqa temploj punkunpi sapa día qolqeta mañakoj. Uj tardetaj, Pedrotawan Juantawan temploman yaykushajta rikuspa nerqa: “Imallatapis qowaychej”, nispa. Pedrotaj nerqa: “Qolqemanta nisqa aswan sumaj imata qosqayki. Jesuspa sutinpi sayarispa puririy”, nispa. Chantá Pedroqa chay runata sayaricherqa, chay runataj purirerqa. Chayta rikuspa runasqa mayta tʼukorqanku, ashkhastaj Jesuspi creerqanku.

Sacerdotes, saduceos imaqa phiñakorqanku. Apostolestataj Jatun Juntaman pusaspa nerqanku: “¿Pejpa atiyninwantaj chay runata sanoyacherqankichej?”, nispa. Pedrotaj nerqa: “Jesucristo atiyta qowayku, pitachus wañucherqankichej chay”, nispa. Paykunataj nerqanku: “Amaña Jesusmanta parlaychejchu”, nispa. Apostolestaj nerqanku: “Mana chʼinlla kakuykumanchu, parlanayku tiyan”, nispa.

Chantá Pedrowan Juanwanqa kacharisqa kasqankutawan, waj yachachisqasman tukuy chay imasta willamorqanku. Tukuyninkutaj orakorqanku: “Yanapariwayku ari, mana manchachikuspa willanallaykupajpuni”, nispa. Diostaj atiyninta paykunaman qorqa willanallankupajpuni, milagrostapis ruwanankupaj. Señorpi creejkunataj astawan yapakusharqanku. Chantá Saduceosqa apostolesta carcelman wisqʼaykorqanku. Chay tutataj Diosqa angelninta kachamorqa, chay angeltaj carcelpa punkusninta kicharispa nerqa: “Riychej temploman, chaypitaj willamuychej”, nispa.

Qʼayantintaj uj runa Jatun Juntaman rispa nerqa: “Carceltaqa sumaj wisqʼasqata taripayku, presochasqa karqanku chay runastaj templopi Jesusmanta willashanku”, nispa. Chantá apostolesta watejmanta wisqʼaykorqanku, Jatun Juntamantaj pusarqanku. Kuraj sacerdotetaj nerqa: “¿Manachu kamacherqayku ama Jesuspa sutinpi yachachinaykichejta?”, nispa. Pedrotaj kuticherqa: “Noqaykoqa  Diostapuni kamachejniykuta jina kasunayku tiyan runasta kasunaykumantaqa”, nispa.

Leymanta yachachejkunaqa mayta phiñakuspa apostolesta wañuchiyta munarqanku. Chantá Gamaliel sutiyoj fariseo nerqa: “Ama kay runasta imanaychejchu, ichapis Dios kay runaswan kashan. Pajtataj Diospa contranpi maqanakushaj rikhuriwajchej”, nispa. Paykunataj Gamalielta kasorqanku. Chayrayku apostolesta jasutʼichispa, amaña Jesuspa sutinpi parlanankuta nerqanku, chantá kachariporqanku. Jinapis apostolesqa mana manchachikuspa templopi, wasimanta wasi willallarqankupuni.