Purita mana puëdeq nunam templupa yëkunanchö limushnata mañakur täraq. Juk tardim, Pëdrutawan Juanta templuman yëkïkaqta rikëkur, “imallatapis qarëkalläyämë” nirqan. Tsënam Pëdruqa kënö nirqan: “Qellëpitapis mas väleqtam qoshqëki. Jesuspa jutinchö, ¡sharkï y puri!”. Tsënö nirir tsarirkur sharkaratsiptinmi purir qallëkurqan. Y llapan nunakunam tsë milagruta rikëkur alläpa kushikuyarqan, y mëtsikaqmi creikur qallëkuyarqan.

Peru sacerdötikunawan saduceukunaqa alläpam piñakuyarqan. Apostolkunata tsarïkurmi Judïukunapa Precisaq Cortinman apayarqan. Tsëchömi, “¿pitaq poderta qoyäshurqunki tsë nunata kachakätsiyänëkipaq?” niyarqan. Pëdruqa, “qamkuna wanutsiyanqëki Jesucristum” nirqanmi. Pëkunanam, “¡amana Jesuspaqqa parlayënatsu!” nirnin piñapäyarqan. Peru apostolkunaqa, “parlarmi sïguiyänä. Manam upällaqa kakuyäshaqtsu” niyarqanmi.

Tsënam Pëdruta y Juanta libri jaqiriyarqan, y pëkunaqa jinan höram ëwayarqan tsënö pasakunqanta creikoq mayinkunata willaq. Y llapankuna juntum Jehoväman mañakuyarqan, “qampita yachatsikur sïguiyänäpaq valorta qoykalläyämë” nirnin. Tsënam Jehoväqa santu espïritunwan yanaparqan yachatsikur y nunakunata kachakätsir sïguiyänampaq. Y mas nunakunam creikoq tikrayarqan. Tsëmi saduceukunaqa piñakurnin apostolkunata yapë carcelatsiyarqan. Peru tsë paqasmi Jehoväpa angelnin chärir carcelpa punkunkunata kicharirqan, nïkurmi, “templuta kutiyë y yachatsikur sïguiyë” nirqan.

Waränin junaqqa Judïukunapa Precisaq Cortinchö carguyoq nunakunatam kënö nishpa willariyarqan: “¡Carcelqa alleq segurashqam këkan, peru qamkuna prësutsiyanqëki nunakunaqa manam kayannatsu! ¡Kananqa templuchönam yachatsikur këkäyan!”. Tsënam apostolkunata yapë tsarïkurnin tsë precisaq cortiman apayarqan. Tsëchömi mandakoq  kaq sacerdöti kënö nirqan: “¿Manaku niyarqaq Jesuspita manana parlayänëkipaq?”. Tsënam Pëdruqa, “nunakunata wiyakuyänäpa rantinqa, Diostam wiyakuyänä” nirqan.

Y llapan precisaq religiösukunam piñakurnin apostolkunata wanutsita munayarqan. Peru Gamaliel jutiyoq fariseum sharkurnin kënö nirqan: “¡Paqtataq llutanta rurëkushwan! Itsapis kë nunakunataqa Dios yanapëkan. Tsëqa, ¿allitsuraq kanman Diospa contran churakashqa?”. Tsënam pë ninqanta cäsukuyarqan. Y garrutiwan alli maqëkur y manana yachatsikuyänampaq amenacëkurmi libri jaqiriyarqan. Peru apostolkunaqa manam yachatsikïta jaqiriyarqantsu. Mana mantsakushpam templuchö y wayin wayin yachatsikur sïguiyarqan.