Shuj suchu runaca caridadta mañangapajmi Diospaj huasi pungupi tiyarij carca. Shuj chishica Pedropish Juanpish Diospaj huasimanmi shamurcacuna. Paicunatami chai runaca, ‘ñucaman imatapish cuhuai’ nishpa mañarca. Shinapish Pedroca, ‘cullquita cunapaj randica Jesuspaj shutipi jatari, puri nini’ nircami. Chashna nishpa jatarichishpa ayudajpica puri callarircallami. Gentecunaca chaita ricushpami Jesusta catijcuna tucurcacuna.

Pero sacerdotecuna, saduceocunaca pꞌiñarircacunami. Chaimantami apostolcunataca religionta pushajcunapajman aparcacuna. Chaipimi, ‘¿chai runata jambingapajca pitaj poderta curca?’ nishpa tapurcacuna. Pedroca, ‘Jesusmi ñucanchijmanca poderta curca. Paitami cancunaca huañuchircanguichij’ nircami. Chashna nijpimi religionta pushajcunaca, ‘¡Jesusmanta ñataj yachachinguichijman!’ nishpa caparircacuna. Pero apostolcunaca, ‘paimanta huillanataca manataj saquishunchu’ nircacunami.

Chaimantami Pedrotapish Juantapish cacharircacuna. Paicunaca chai ratomi discipulocunapajman rishpa imalla tucushcata parlarcacuna. Chai qꞌuipaca tucuicunami tandalla, ‘canmanta huillashpa catingapaj mana manchana yuyaita cuhuai’ nishpa Diosta mañarcacuna. Yaya Dios espíritu santota cujpimi paicunaca huillashpa, milagrocunatapish rurashpa catircacuna. Chaimi achcacunaca Jesusta catijcuna tucurcacuna. Cutin saduceocunaca achca envidiata charishcamantami apostolcunataca carcelpi churarcacuna. Pero chai tutaca carcelpaj pungucunata pascangapajmi Diosca shuj angelta cacharca. Chai angelca apostolcunataca, ‘Diospaj huasiman cutin rishpa, huillaichij’ nircami.

Cayandij punllaca shuj runami religionta pushajcunapajman rishpa, ‘carcelca llavishcami carca. Pero chaipi cajcunaca mana ricurircacunachu. Cunanca paicunaca Diospaj huasipimi yachachicun’ nirca. Chaimi apostolcunataca religionta  pushajcunapajman cutin pusharcacuna. Sacerdotecunata mandajca, ‘Jesusmantaca ñataj yachachinguichijman nishpami mandarcanchij’ nircami. Pero Pedroca, ‘Runacunata cazunapaj randica, Diostami cazuna canchij’ nircacunami.

Religionta pushajcunaca yallitaj colerashpami apostolcunataca huañuchisha nircacuna. Chaipimi Gamaliel nishca fariseoca, ‘cai runacuna Dioshuan cajpica ama imata ruranguichijchu. Dioshuanca pipish mana macanacui tucunchu’ nircami. Chashna nijpimi religionta pushajcunaca apostolcunata macashpa, ‘ñataj cutin huillashpa catinguichijman’ nishpa cacharircacuna. Pero paicunaca mana manchashpami Diospaj huasipipish huasin huasin rishpapish huillashpa catircacuna.