Huk suchu runam Diospa wasinpa punkunpi sapa punchaw limosnakustin tiyaq. Juanwan Pedro chayaruptinkum chay suchu runaqa nirqa: “Imallaykichiktapas quykuwaychik”, nispa. Pedroñataqmi nirqa: “Qullqimantapas aswan allintaraqmi qusqayki. Jesuspa sutinpim niki: ‘¡Hatarispayki puriy!’”, nispa. Hinaptinmi chay suchu runaqa purirqaña. Chayta rikuykuspankum runakunaqa Jesuspa qatiqninña karqaku.

Sacerdotekunawan saduceo runakunam ichaqa piñakuspanku, apostolkunata autoridadkunapa huñunakunankuman pusarurqaku, chaytam suticharqaku sanedrin nispa. Hinaspam tapurqaku: “¿Pitaq atiyta qusurqankichik suchu runata allinyachinaykichikpaq?”, nispa. Hinaptinmi Pedro nirqa: “Wañurachisqaykichik Jesusmi”, nispa. Wakin autoridadkunañataqmi qaparirqaku: “¡Ama Jesusmantaqa rimaychikchu!”, nispa. Apostolkunam ichaqa nirqaku: “Jesusmanta rimaytaqa manam saqisaqkuchu”, nispa.

Kachaykuptinkum Pedrowan Juanqa chaylla iñiqmasinkunaman willaq rirqaku, chaypim Diosta kaynata mañakurqaku: “Qanmanta hinalla willakunaykupaqyá kallpata quykullawayku”, nispa. Chaymi chuya espiritunta Jehova Dios quykuptin hinalla willakurqaku hinaspa unquqkunatapas sanoyachirqaku. Hinaptinmi runakunaqa aswanraq Jesuspa qatiqnin rikurirqaku. Saduceokunañataqmi chiqnikuspanku apostolkunata presocharurqaku. Hinaptinmi Jehova Diosqa angelninwan preso kasqankumanta hurqurachispan nichirqa: “Kaqmanta Diospa wasinman rispayá willakamuychik”, nispa.

Paqarinninmanñataqmi autoridadkunaman huk kaqnin riruspan niykamurqa: “¡Carceltaqa sumaq wichqasqatam tariramuni, manam pipas ukupiqa kanchu! ¡Diospa wasinpiñam willakuchkanku!”, nispa. Chaymi apostolkunataqa kaqmanta hapiruspanku autoridadkunaman  pusarurqaku. Chaymi sacerdotekunapa jefen nirqa: “¡Nikichikñataq Jesusmantaqa amaña willakunaykichikpaq!”, nispa. Pedroñataqmi nirqa: “Runakunamantaqa Diostam kasukunayku”, nispa.

Autoridadkunam llumpayta piñakuspanku apostolkunata wañurachiyta munarqaku. Chaymi Gamaliel sutiyuq fariseo runa sayariykuspan nirqa: “¡Yanqañataq! Ichapas Diosqa paykunawan kachkan. ¿Dioswan atipanakuytachu munachkankichik?”, nispa. Autoridadkunañataqmi kasuspanku maqaparuspa kachaykurqaku, nirqakutaqmi amaña willakunankupaq. Chaywanpas apostolkunaqa hinallam mana manchakuspa Diospa wasinpi hinaspa wasin-wasinpas willakurqaku.