Mana puriyta atiq runan temploq punkunpi limosnata mañakuq. Juj tardenmi Pedrowan Juanwan temploman jaykusharanku, jinan chay runaqa niran: “Imallatapas qoykuwaychis”, nispa. Pedrotaq niran: “Qolqemanta aswan valorniyoqta qosayki. ¡Jesuspa sutinpi puririy!”, nispa. Jinan Pedro makinmanta aysaqtin runaqa sayarispa puriripuran. Runakunaqa anchatan admirakuranku chay milagromanta, jinaspa Jesuspa discipulon kapuranku.

Sacerdotekunapas saduceokunapas sinchitan phiñakuranku. Apostolkunata jap’ispankutaq juzgananku salaman aparanku. Jinaspa tapuranku: “¿Pin atiyta qorasunkichis chay runata qhaliyachinaykichispaq?”, nispa. Pedrotaq niran: “Chay atiytaqa wañuchisqaykichis Jesucriston qowaranku”, nispa. Paykunataq niranku: “¡Aman Jesusmantaqa rimankichischu!”, nispa. Apostolkunataq niranku: “Paymantaqa rimanaykupunin, manan upallakusaqkuchu”, nispa.

Jinan Pedrotapas Juantapas kacharipuranku, paykunataq discipulokunaman willaranku imachus pasasqanta. Chaymi llapanku Diosmanta mañakuranku: “Yanapawayku mana manchakuspa rimashanallaykupaq”, nispa. Jinan santo espirituta chaskispa predicashallaranku milagrokunatapas ruwashallaranku. Aswan askha runakunataq Jesuspi iñipuranku. Saduceokunan ichaqa apostolkunata carcelman wisq’aranku. Chay tutan ichaqa Diospa angelnin carcelpa punkunta kichaspa niran: “Temploman rispa predicashallaychis”, nispa.

Qhepantin p’unchaymi juj runa salapi kaq umalliqkunaman willaran: “¡Carcelpa punkunkunaqa wisq’asqan kashan, wisq’achisqaykichis runakunan ichaqa templopi kashanku runakunaman predicaspa!”, nispa. Chaymi apostolkunata jujmanta jap’imuspanku juzgananku salaman apamuranku.  Uma sacerdotetaq niran: “¡Kamachiraykichismi Jesusmanta ama rimanaykichispaq!”, nispa. Pedrotaq niran: “Diostan ñaupaqtaqa kasukunayku runakunata kasunaykumantaqa”, nispa.

Jinan chay umalliqkunaqa apostolkunata wañuchiytaraq munaranku. Ichaqa Gamaliel sutiyoq fariseon sayarispa niran: “¡Kay runakunawanqa yaqapaschá Dios kashan! Dioswanqa manan maqanakuytaqa munawaqchischu ¿riki?”, nispa. Payta kasuspankun kacharipuranku, k’aspiwan maqaspataq kamachiranku amaña predicanankupaq. Apostolkunan ichaqa mana manchakuspa Jesusmanta predicashallaranku templopipas wasin-wasintapas.