Jekh manuš so našti sine te phirel, sekova dive mangela peske sine angli porta e hrameskiri. Jekh dive paloručko, ov dikhlja e Petare hem e Jovane sar khuvena ko hrami. Ov vakergja lenge: „Molinava tumen den man nešto pare“. O Petar odgovoringja: „Pare nane man, ama isi man te dav tut nešto pošukar. Ko anav e Isuseskoro, ušti hem phir!“ O Petar pomožingja leske te uštel, hem o manuš počmingja te phirel. O manuša so dikhle akava čudo sine vooduševime hem but džene ule učenikija.

Ama o sveštenikija hem o sadukeija but holjangje. Ola astargje e apostolen, ingargje len anglo Sudsko sovet, hem pučle len: „Koj dengja tumen sila te sasljaren akale manuše?“ O Petar odgovoringja: „I sila dobingjem taro Isus Hristos, kole so mudargjen le“. O verska vodačija počmingje te vikinen: „Ma keren više lafi bašo Isus!“ Ama, o apostolija vakergje: „Amen mora te kera lafi baši leste. Nane te otkažina amen“.

Keda o Petar hem o Jovan sine oslobodime, gele ko javera učenikija te vakeren lenge so ulo. Ola zaedno molingje pe: „Jehova, molinaja tut de amen hrabrost te šaj te kera i zadača so dengjan amen“. O Jehova dengja len sveti duh hem ola ponadari da propovedinena sine hem sasljarena sine. Sa poviše hem poviše manuša ovena sine učenikija. O sadukeija sine doborom ljubomorna so astargje e apostolen hem phanle len. Ama, rakjate o Jehova bičhalgja jekhe angele kova so phravgja o udar taro zatvor hem vakergja e apostolenge: „Džan palem ko hrami hem sikaven e manušen!“

Rano sabajle, o stražarija ale ko Sudsko sovet hem vakergje lenge: „O zatvor tano phanlo, ama o manuša so sine phanle nane adathe! Ola tane ko hrami hem sikavena e manušen!“ Tegani palem astargje len hem ingargje len anglo sudo.  O prvosvešteniko vakergja lenge: „Neli vakergjem tumenge te na keren lafi bašo Isus?“ Ama, o Petar odgovoringja: „Mora te šuna e Devle amare vladetele, a na e manušen“.

O verska vodačija sine but holjame hem mangena sine te mudaren e apostolen. Ama, jekh farisei, o Gamaliel, uštilo hem vakergja: „Ma sigjaren! Šaj o Devel tano akale manušencar. Mangena li te borinen tumen protiv o Devel?“ Ola šungje le. Angleder te mukhen len, margje len kaštencar hem palem vakergje lenge te na propovedinen. Ama, akava na čhinavgja e apostolen te propovedinen. Ola ponadari da hrabro vakerena sine e javerenge bašo šukar haberi — hem ko hrami hem taro kher ko kher.