Jekh manuš kova naštindža te phirel bešlja ki hramsko kapija. Svako dive odothe manglja pare. Jekh dive palopladne, ov dikhlja e Petare hem e Jovane sar džana ko hram. Ov phendža ljendže: „Molinava tumen, den man diso.“ O Petar phendža: „Isi man te dav tut diso soj tano pošukar ando pare. Ko e Isuseso nav, ušti hem phir!“ O Petar pomožindža lje hem o manuš počmindža te phirel! O manuša hine oduševime odoljeja so dikhlje. Sebepi odova, but manuša ulje e Isusese učenikija.

Ama, o sveštenikija hem o sadukeja hine but holjame. On astardže e apostolen, igardže ljen anglo sudo hem pučlje ljen: „Ko dindža tumendže zoraljipe te sačaren akalje manuše?“ O Petar phendža: „O zoraljipe dobindžam ando Isus kas tumen mudardžen.“ O religiozna vođe počmindže te pištinen: „Ma vačeren više ando Isus!“ Ama, o apostolija phendže: „Amen našti, a te na vačera oljestar.“

Ked mukhlje e Petare hem e Jovane, on odmah dželje ko avera učenikija hem phendže ljendže so ulo. Odoljese, on sare zajedno molindže pe e Jehovase hem phendže ljese: „Molinaja tut, pomožin amendže te ova hrabra te šaj hem ponodri te čera i buti koja dindžan amendže.“ O Jehova šundža oljengi molitva hem dindža ljen po sveti duh kova pomožindža ljen te nastavinen te propovedinen hem te sačaren e manušen. Sa pobuter hem pobuter manuša ulje e Isuse učenikija. O sadukeja odobor hine holjame so astardže e apostolen hem fordindže ljen ko phanljipe. Ama, račate, o Jehova bičhaldža jekhe anđele, kova phravdža o udara ando phanljipe hem phendža e apostolendže: „Džan ko hram hem odothe sikaven e manušen.“

Tajsato dive sabalje, o vojnikija alje ko Sinedrion, ko sudo, hem phendže: „O zatvor tano phanlo, ama o manuša kola hine andre, akana nane odothe! On tane ko hram, hem odothe sikavena e manušen!“ Paljem, o apostolija hine astarde hem ljegarde anglo  sudo. O prvosveštenik phendža: „Amen phendžam tumendže te na vačeren ando Isus! Ama, o Petar phendža: „Amen valjani te šuna e Devlje, a na e manušen.“

O religiozna vođe hine odobor holjame so manglje te mudaren e apostolen. Ama, jekh farisej kova vičindža pe Gamalilo uštindža hem phendža: „Arakhen tumen! Šaj tano o Devel akalje manušencar. Da li čače mangena te borinen tumen protiv o Devel?“ On šundže oljese lafija. Ama, angljeder te mukhen ljen, on zapovedindže ljendže više te na propovedinen hem mardže ljen e bičeja. Ama, iako doživindže sa odova o apostolija nastavindže hrabro te propovedinen. On propovedindže o šukar haberi hem ko hram hem kotar čher ko čher.