Mamuna wakuti nee akhakwanisa famba akhadakhala pantsi mbaphemba pinthu ntsiku zonsene pansuwo wa templo. Ntsiku inango namacibese, iye aona Pedhru na Juwau mbakapita mu templo. Iye aaphemba toera ampase cinthu. Pedhru alonga: ‘Ndiri na cinthu cadidi kakamwe cakupiringana kobiri cakuti ndisafuna kukupasa. Mu dzina ya Yezu, lamuka ufambe!’ Buluka penepo, Pedhru amphedza toera kulamuka, natenepa mamuna unoyu atoma kufamba! Mbumba yakomerwa kakamwe na cirengo ceneci kwakuti anthu azinji atoma kukhulupira.

Mbwenye anyantsembe na Asadhuki akhali akuipirwa kakamwe. Iwo aphata apostolo mbaenda nawo ku thando yakutonga miseru, mbaabvundza: ‘Mbani akupasani mphambvu toera kuwangisa mamuna unoyu?’ Pedhru atawira: ‘Ife tatambira mphambvu kubulukira kuna Yezu Kristu, ule adapha imwe.’ Atsogoleri a mauphemberi akhuwa mbati: ‘Lekani longa pya Yezu!’ Mbwenye apostolo alonga: ‘Ife tisafunika kulonga pya iye. Ife cipo tinasiya kulonga thangwi ya Yezu.’

Mwakukhonda dembuka, Pedhru na Juwau asudzulwa. Natenepa, iwo aenda kuna anyakupfundza anango mbaapanga pidacitika. Iwo acita phembero pabodzi mbaphemba Yahova, mbati: ‘Taphata miyendo, tiphedzeni toera tikhale acipapo kuti tikwanise kucita basa yanu.’ Yahova aapasa nzimu wakucena. Natenepa iwo apitiriza kumwaza mphangwa na kuwangisa atenda. Anthu azinji kakamwe atoma kukhulupira. Asadhuki akhali na ntcanje. Iwo amanga apostolo mbaaendesa n’kaidi. Mbwenye namasiku, Yahova atuma anju wakuti afungula misuwo ya kaidi, mbapanga apostolo: ‘Ndokoni pontho kapfundzisa mu templo.’

Mangwana mwace namacibese, atsogoleri a mauphemberi akhadapangwa kuti: ‘Kaidi yafungwa, mbwenye amuna adamanga imwe amala kuenda! Iwo ali mu templo mbakapfundzisa anthu!’ Apostolo amangwa pontho mbaendeswa  ku Thando ya miseru. Nyantsembe wankulu alonga: ‘Ife takupangani toera mukhonde kulonga pya Yezu!’ Mbwenye Pedhru atawira: ‘Ife tisafunika kubvera Mulungu ninga ntongi, kupiringana anthu.’

Atsogoleri a mauphemberi akhadaipirwa kakamwe kwakuti akhafuna kupha apostolo. Mbwenye Nfarisi unango akhacemerwa Gamalyele alamuka mbalonga: ‘Citani mphole! Panango Mulungu ali pabodzi na amuna anewa. Musafunadi kumenyana na Mulungu?’ Iwo abvera uphungu wace. Pakumala kumenya apostolo na mitcamu, iwo aapanga pontho toera akhonde kumwaza mphangwa, mbaaleka pyawo kuti aende. Mbwenye pyenepi nee pyalimirisa apostolo. Iwo apitiriza kumwaza mphangwa zadidi mwacipapo mu templo na nyumba na nyumba.