Mittu lekka laanshaawino manchi barru baala qullaawu mini xullichira ofolle huucciˈranno. Mitto barra, isi Pheexiroosinna Yohaannisi qullaawa mine eˈanna lae, ‘Woxe uuyyeˈˈe’ yee huucciˈri. Pheexiroosi togo yii: ‘Woxe roorinore eemmohe. Yesuusi suˈminni kaˈe haˈri!’ Pheexiroosi amade kayiseenna manchu kae qaafa hanafi. Mannu tenne maalale lae lowo geeshsha hagiidhino; hattono lowo manni Kiristaana ikkino.

Farisootunna Seduqootu kayinni lowo geeshsha hanqitu. Insa soqqamaasine Ayihudete songowa massite, ‘Konne mancho hursitinanni gede wolqa uyinoˈnehu ayeti?’ yite xaˈmitunsa. Pheexiroosi, ‘Ninkera wolqa kiˈne shitinihu Yesuusi Kiristoosi uyinonke’ yii. Ammaˈnote murrooti ‘Yesuusi suˈma gana agurre!’ yite cancitu. Soqqamaasine kayinni, ‘Diagurreemmo; isi daafira coyiˈra hasiissannonke’ yitu.

Pheexiroosinna Yohaannisi hakkiinni fultanni heedhenni wole rosaanowa marte ikkinore kultunsa. Insa gamba yite, ‘Yihowa, waajjinummokkinni loosokki loosa dandiineemmo gede kaaˈlinke’ yite huuccidhu. Yihowa qullaawa ayyaana uyinonsa daafira, sabbakanna xiwamino manna hursa diagurtino. Konni daafira lowo manni Kiristaana ikkino. Seduqootu hinaassino daafira soqqamaasine amadde usurtunsa. Ikkollana Yihowa hashsha sokkaasincho soyenna, sokkaasinchu usuru mini cufana fane soqqamaasine, ‘Hadhine qullaawa mine noo mannira rosiisse’ yiinsa.

Layinki soodo Sanihediriini yinannihu yoote mini murrootira togo yine kullinsa: ‘Usuru mini waalchi cufame no; usurtini manni kayinni fulino! Insa qullaawa mine marte manna rosiissanni no!’ Xaano soqqamaasine amadde Sanihediriini songowa massitunsa. Kakkalaanote biili, ‘Yesuusi suˈminni coyidhinoonte yine kuloommoˈne’ yii. Pheexiroosi kayinni togo yee  qoli: “Mannaho hajajamantenni Maganoho hajajama hasiissannonke.”

Ammaˈnote murrooti lowo geeshsha hanqitino daafira, soqqamaasine shaate heddu. Hakkiinni mittu Gamaaliyaali yinanni Farisichi kae uurre togo yii: ‘Konni manni aana assitinannire layidhinanni asse! Maganu insa ledo nooha ikkara dandaanno. Maganu ledo giwama hasidhinannini?’ Insano isi yiinonsare macciishshitu. Soqqamaasine siqqotenni gantu gedensaanni, layinkita sabbakkannokki gede kulte haˈrissunsa. Ikkollana soqqamaasine sabbaka diagurtino. Insa waajjitukkinni dancha duduwo qullaawa minenna minunni mine hadhe sabbakkino.