Nisy lahilahy kombo zay nangataky tamy vavahadini-tempoly teo sanandro. Nihitany Petera noho Jaona ndraiky zay lafa hilitsy amy tempoly ao, le nangatahany drala. Hoy Petera: ‘Mbo soa mandilatsy drala raha hameako anao toy. Amy anarani-Jesosy, mitsangana le mandehana!’ Natsangani-Petera ie, ka nandeha! Nifalifaly biby ty olo lafa nahita ani-fahagagà iny, ka maro ty nanjary mpino.

Fe neloky mpisoro noho Sadoseo rey. Nisamborin-drozy apostoly rey, le nandesin-drozy tamy fitsarà teny, bakeo nanontanean-drozy hoe: ‘Ia ty nanome anareo fahefà hitaha ani-lahilahy io?’ Namaly Petera hoe: ‘Jesosy Kristy, azy nivonoanareo iny.’ Le hoy mpitariky fivavaha rey: ‘Tsy mahazo miresaky mikasiky ani-Jesosy zao sasy nareo!’ Fe nivola apostoly rey hoe: ‘Tsy maintsy miresaky mikasiky azy avao aloha zahay. Tsy hieny zao zahay.’

Laha vo nabototsy Petera noho Jaona, le nandeha amy mpianatsy sisany rey any nitantara ty raha niseho. Bakeo rozy niaraky nivavaky tamy Jehovah hoe: ‘Ampeo lahy zahay mba hahasaky hanao ty asanao.’ Nameani-Jehovah fanahy masy rozy, ka afaky nitory avao sady nitaha olo. Nimaro biby ty nanjary mpino. Nialona Sadoseo rey, farany nisamborin-drozy apostoly rey le nigadran-drozy. Fe tamy haly iny avao, le naniraky anjely Jehovah. Nivohani-anjely iny varavarani-prizon io, le hoy ty asany tamy apostoly rey: ‘Ndany ndraiky mampianatsy amy tempoly any.’

Nisy nivola tamy fitsarà jiosy tany hamaray maraindrain’iny hoe: ‘Mbo mihily soa anè prizon io, kanefa tsy ao lahilahy nisamborinareo rey! Mampianatsy olo amy tempoly any rozy!’ Nisambory ndraiky apostoly rey, le nandesy amy fitsarà any. Nivola mpisorobe iny hoe: ‘Tsy fa nivola anareo moa zahay hoe tsy mahazo miresaky mikasiky ani-Jesosy zao sasy nareo!’  Fe hoy Petera: “Ndranahary ro mpanday anay ka ie ro tsy maintsy orihinay safà, fa tsy olo.”

Neloky biby mpitariky fivavaha rey, ka tean-drozy ho nivonoa apostoly rey. Fe nisy Fariseo raiky mana anara Gamaliela zay nitsanga, le nivola hoe: ‘Mitandrema avao nareo tsy no manampy an-drozy vatany Ndranahary! Ta hialy amy Ndranahary nareo?’ Neken-drozy safàni-Gamaliela iny. Farany nivangoan-drozy avao apostoly rey sady niraràn-drozy tsy hitory sasy, le bakeo nengan-drozy handeha amy zay. Fe tsy nampijano ani-apostoly rey raha zay. Mbo nahasaky nitory ty vaovao soa avao rozy, ndre tamy tempoly tao zay, ndre santrano.