Një burrë që nuk ecte, ulej dhe lypte përditë pranë derës së tempullit. Një pasdite, ai pa Pjetrin dhe Gjonin teksa hynin në tempull. Ai u tha: «Ju lutem, më jepni ndonjë gjë!» Pjetri iu përgjigj: «Do të të jap diçka më të mirë se paratë. Në emër të Jezuit, ngrihu dhe ec!» Pastaj Pjetri e ndihmoi të çohej dhe burri nisi të ecte. Aq shumë u gëzua turma nga kjo mrekulli, saqë shumë të tjerë u bënë besimtarë.

Por priftërinjtë dhe saducenjtë u zemëruan. I kapën apostujt, i çuan në Sinedër, pra gjykata e udhëheqësve fetarë, dhe i pyetën: «Kush ua dha fuqinë të shëroni këtë njeri?» Pjetri u përgjigj: «Ne e morëm fuqinë nga Jezu Krishti të cilin ju e vratë.» Udhëheqësit fetarë u bërtitën: «Mos flisni më për Jezuin!» Por apostujt thanë: «Ne duhet të flasim për të. Nuk do të pushojmë së foluri.»

Sapo u liruan, Pjetri dhe Gjoni shkuan te dishepujt e tjerë dhe u thanë ç’kishte ngjarë. Ata iu lutën së bashku Jehovait: «Na ndihmo të jemi të guximshëm, të lutemi, që të vazhdojmë të bëjmë veprën tënde.» Jehovai u dha frymën e shenjtë dhe ata vazhduan të predikonin e të shëronin. Shumë e më shumë veta u bënë besimtarë. Saducenjtë ishin kaq xhelozë, saqë i arrestuan apostujt dhe i futën në burg. Megjithatë, gjatë natës, Jehovai dërgoi një engjëll që hapi dyert e burgut dhe u tha apostujve: «Kthehuni në tempull dhe atje mësojeni popullin.»

Të nesërmen në mëngjes u njoftua Sinedri: «Burgu është akoma i mbyllur, por burrat që arrestuat kanë ikur. Janë në tempull duke mësuar popullin.» Përsëri  apostujt i arrestuan dhe i çuan në Sinedër. Kryeprifti u tha: «Ju urdhëruam të mos flitni më për Jezuin!» Pjetri u përgjigj: «Ne duhet t’i bindemi Perëndisë si sundimtar, dhe jo njerëzve.»

Udhëheqësit fetarë ishin kaq të zemëruar, saqë donin t’i vritnin apostujt. Por një farise me emrin Gamaliel u ngrit dhe tha: «Hapni sytë! Perëndia mund të jetë me këta burra. Vërtet doni të luftoni kundër Perëndisë?!» Ata ia vunë veshin këshillës së tij. Pasi i rrahën apostujt me thupër, i urdhëruan edhe një herë që të mos predikonin, e pastaj i lanë të iknin. Por kjo nuk i ndali apostujt. Ata vazhduan të predikonin lajmin e mirë me guxim, në tempull dhe nga shtëpia në shtëpi.