Indvodza letsite lebeyingakhoni kuhamba beyihlala egedeni lasethempelini icele lokutsite. Ngalelinye lilanga, yabona Phetro naJohane baya ethempelini. Yatsi kubo: ‘Ngicela ningiphe imali.’ Phetro watsi: ‘Ngite imali, kodvwa ngitakunika loko lenginako: Egameni laJesu ngitsi kuwe, sukuma uhambe!’ Ngako Phetro wayisukumisa lendvodza yase iyahamba. Bantfu labanyenti bajabula nababona loku futsi labanye baba ngemakholwa.

Kodvwa baPhristi nebaSadusi bakwata kakhulu. Babamba labaphostoli babayisa enkantolo, bafike batsi: ‘Ngubani loninike emandla ekuphilisa lendvodza?’ Phetro watsi: ‘Sinikwe nguJesu, lona lenambulala.’ Baholi benkholo bamemeta batsi: ‘Yekelani kukhuluma ngaJesu!’ Kodvwa baphostoli batsi: ‘Angeke siyekele kukhuluma ngaye.’

Ngesikhatsi boPhetro naJohane babakhulula enkantolo, baya kulalabanye bafundzi bafike babacocela lobekwentekile. Bathantaza ndzawonye bacela Jehova kutsi abasite babe nesibindzi kuze batochubeka bente lomsebenti. Jehova wabaniketa umoya longcwele futsi bachubeka bashumayela futsi baphilisa bantfu. Bantfu labanyenti baba ngemakholwa. BaSadusi baba nemona baze babamba labaphostoli babavalela ejele. Kodvwa ebusuku, Jehova watfumela ingilosi yakhe leyavula iminyango yelijele, yatsi kulabaphostoli: ‘Hambani niye ethempelini, nifike nifundzise bantfu.’

Ngakusasa ekuseni, labebagadzile batjela emalunga eNkantolo YemaJuda nebaholi benkholo batsi: ‘Sitfole kukhiyiwe ejele, kodvwa lamadvodza lebeniwabophile asikawatfoli. Nyalo asethempelini afundzisa bantfu.’ Labaphostoli baphindze babanjwa bayiswa enkantolo yemaJuda. Umphristi lophakeme watsi: ‘Besiniyalisise kahle kutsi ningachubeki nekufundzisa ngalelibito laJesu.’ Kodvwa Phetro waphendvula  watsi: ‘Kufanele silalele Nkulunkulu njengobe angumbusi kunekutsi silalele bantfu.’

Nabeva loku baholi benkholo bakwata kakhulu baze bafuna nekubabulala. Kodvwa lenye indvodza lengumFarisi, lebitwa ngekutsi nguGamaliyeli yasukuma yatsi: ‘Wayekeleni lamadvodza. Kungenteka lomsebenti lawentako uvela kuNkulunkulu. Nitawutitfola senilwa naNkulunkulu.’ Ngako basilalela leseluleko sakhe, babita labaphostoli, babashaya, babatjela nekutsi bayekele kushumayela, base bayabakhulula. Kodvwa loko akuzange kubavimbe labaphostoli. Ngesibindzi bachubeka bashumayela tindzaba letimnandzi ethempelini nasemtini ngemuti.