Loron-loron mane ida neʼebé ain-aat tuur iha templu nia odamatan no husu ezmola. Iha lokraik ida, nia haree Pedro no João tama ba templu. Nia husu osan ba sira, maibé Pedro dehan: ‘Haʼu iha buat ida neʼebé diʼak liu fali osan atu fó ba Ita. Hodi Jesus nia naran, hamriik no laʼo bá!’ Tuirmai Pedro ajuda mane neʼe atu hamriik no mane neʼe komesa laʼo. Ema-lubun kontente tebes ho milagre neʼe, no ema barak sai fiar-naʼin.

Maibé amlulik no ema Saduseu sira sai hirus. Sira kaer apóstolu sira no lori ba tribunál, no dehan: ‘Sé mak fó imi kbiit atu kura mane neʼe?’ Pedro hatán: ‘Ami simu kbiit husi Jesus Kristu neʼebé imi oho.’ Ulun-naʼin relijiaun sira-neʼe hakilar: ‘Keta koʼalia tan kona-ba Jesus!’ Maibé apóstolu sira dehan: ‘Ami tenke koʼalia kona-ba nia. Ami sei nunka para.’

Kuandu livre tiha, Pedro no João bá hasoru dixípulu sira seluk no konta kona-ba buat neʼebé akontese. Sira halo orasaun hamutuk no husu ba Jeová: ‘Favór ajuda ami atu aten-brani hodi bele kontinua halaʼo Ita-nia serbisu.’ Jeová haraik ninia espíritu santu no sira kontinua haklaken no mós kura ema. Ema barak liután sai fiar-naʼin. Ema Saduseu sai laran-moras, tan neʼe sira kaer apóstolu sira no hatama ba komarka. Maibé iha kalan, Jeová haruka anju ida loke komarka nia odamatan. Anju neʼe dehan: ‘Fila fali ba templu no hanorin iha neʼebá.’

Dadeer tuirmai, guarda sira fó-hatene ba Sinédriu, tribunál husi ulun-naʼin relijiaun sira, hodi dehan: ‘Komarka sei xave metin hela, maibé mane sira neʼebé imi kaer la iha ona. Agora sira hanorin hela iha templu!’ Dala ida tan, sira kaer  apóstolu sira no lori ba Sinédriu. Amlulik boot dehan: ‘Ami bandu ona imi atu la koʼalia kona-ba Jesus.’ Maibé Pedro hatán: ‘Ami tenke halo tuir Maromak nuʼudar ukun-naʼin duké halo tuir ema.’

Ulun-naʼin relijiaun sira sai hirus no hakarak oho apóstolu sira. Maibé ema Farizeu ida naran Gamaliel hamriik no dehan: ‘Kuidadu bá! Karik Maromak apoia sira. Imi hakarak funu hasoru Maromak ka?’ Sira rona ninia konsellu. Sira baku apóstolu sira, bandu atu la haklaken tan, no tuirmai husik sira livre. Maski nuneʼe apóstolu sira kontinua haklaken liafuan diʼak ho aten-brani iha templu no mós husi uma ba uma.