Nisy lahilahy tsy nahay nandeha, nipetrake tamy i vavahady i tempolỳ eo isan’andro, mba hangatake. Tamy ty folakandro indraike zay, le nahatrea i Petera naho i Jaona ho amy i tempolỳ ao reke. Hoe reke tamy iareo: ‘Mangatake raho ajafady.’ Hoe ty Petera: ‘Misy raha soa ambone ty drala, homeiko azo. Amy ty agnara i Jesosy, mitsangàna rehe sady mandenà!’ Nampitsangàne i Petera amy izay reke, le nanomboke nandeha.’ Nifale iaby ze ndaty nahatrea i fahagagagney, le maro ty nanjare mpino.

Niboseke o mpisorogneo naho o Sadoseo tamy izay. Tsinepa iareo i apostoly rey, le nandese iareo amy i fitsaràgney agne. Nagnontane iareo tie: ‘Ia ty nagnomey hery anareo hagnasitragnagne ty lahilahỳ tia?’ Hoe ty Petera: ‘I Jesosy vinono’areoy.’ Nendaha o mpitarike fivavahagneo iareo tie: ‘Le ndra ajanogno’areo ty rehake miomba i Jesosy!’ Hoe i apostoly rey: ‘Tsy maintsy mirehake miomba aze zahay fa tsy hitsigne.’

Naho fa vinotsotse ty Petera naho i Jaona, le nimbamy i mpianatse ila’e rey mbeo. Rineha iareo ty raha niseho. Niarake nivavake tamy i Jehovah iareo tie: ‘Ampeo zahay ajafady mba tsy hatahotse hitory.’ Nimea i Jehovah fagnahy masigne iareo, le afake nitory sady nanao fahagagagne. Nihamaro ty ndaty nanjare mpino. Nialogne mafe o apostoly reo o Sadoseò, le ginadra’e iareo. Faie nandefa anjely ty Jehovah hanokake i lalagney, le hoe reke tamy i apostoly rey: ‘Miheregna an-tempoly agne indraike, le mampianara ao.’

Ie nimaray igne, le nisy nirehake tamo o Fitsaràgne Jiosio tie: ‘Mihily i figadragney, faie i lahilahy tsinepa’areo rey ro tsy ao! Mampianatse amy i tempolỳ ao iareo amy izao!’ Tsinepake indraike iareo, le nandesegne tamy ty Fitsaràgne Jiosio agne.  Hoe i mpisorom-beỳ: ‘Ko mirehake ty miomba i Jesosy sasa nareo.’ Le hoe ty navale i Petera: “Andrianagnahare ro mpitondra anay, le ie ro ankatoave’ay, fa tsy ndaty.”

Boseke i mpitarike fivavahagne rey sady te hamono i apostoly rey. Faie hoe ty Fariseo raike atao tihoe Gamaliela: ‘Mitaoa nareo fa Andrianagnahare ty miomba o lahireo. Sa te hialy aman’Andrianagnahare nareo?’ Jinera iareo i apostoly rey, le vinotso iareo sady rinara iareo tsy hitory ty miomba i Jesosy sasa. Faie tsy nimete i apostoly rey fa mbe nanohy nitory avao ndra tamy i tempolỳ ao ndra isake tragno.