Pami kɛmɔtshi kaki kɔkɛndakɛndaka akadjasɛka lo soko dia tɛmpɛlɔ lushi tshɛ alɔmbana diangɔ. La dikɔlɔ dimɔtshi, nde akɛnyi Petero la Joani watɔtɔ lo tɛmpɛlɔ. Nde akawatɛ ate: ‘Lam’alanganyu nyombisha yangɔ mɔtshi.’ Petero akawotɛ ate: ‘Dimi lekɔ la ɛngɔ kɛmɔtshi koleki falanga nɛmɔ kayangami kosha. Lo lokombo la Yeso, emala ndo nkɛndakɛnda!’ Ko Petero akawemadia ndo pami kakɔ akatatɛ nkɛndakɛnda! Olui w’anto wakangɛnangɛna efula l’ɔtɛ wa dihindo sɔ ko anto efula wakakome ambetawudi.

Koko ɛlɔmbɛdi ndo Asadukɛ wakadunganɛ la nkɛlɛ. Vɔ wakande apɔstɔlɔ, ko wakatshu la wɔ otsha lo tominadi ndo wakawambola vate: ‘Onyosha wolo wa nkɔnɔla pami kɛnɛ?’ Petero akate ate: ‘Sho takalongola wolo oma le Yeso Kristo, lakanyadiake.’ Ewandji w’ɛtɛmwɛlɔ wakahangɔ vate: ‘Nyotshike ntɛkɛta dikambo dia Yeso!’ Koko apɔstɔlɔ wakate vate: ‘Sho pombaka ntɛkɛta dikambo diande. Hatototshika.’

Kam’akawatshungola Petero nde la Joani, vɔ wakatshu le ambeki akina ndo wakatowatɛ kɛnɛ kakete. Vɔ wakalɔmbɛ kaamɛ, walɔmba Jehowa ɔnɛ: ‘Lam’alangayɛ otosha dihonga dia sho ntetemala nkamba olimu ayɛ.’ Jehowa akawasha nyuma kande k’ekila, ko wakatetemala nsambisha ndo nkɔnɔla. Anto akina efula wakakome ambetawudi. Asadukɛ wakawaoke kandjema efula ko wakande apɔstɔlɔ ndo wakawadje lo lokanu. Koko l’otsho, Jehowa akatome ondjelo ɔmɔtshi ko ondjelo akɔ akadihola nkuke ya lokanu ndo akatɛ apɔstɔlɔ ate: ‘Nyokalole otsha lo tɛmpɛlɔ ndo nyotetsha lɛkɔ.’

La wedi pindju, anto wakatɛ ase tominadi ta laadiko, tominadi t’ewandji w’ɛtɛmwɛlɔ vate: ‘Lokanu lakadihami, koko apami wakanyande wakatshwe! Vɔ wekɔ lo tɛmpɛlɔ, wetsha anto!’ Apɔstɔlɔ wakandama nto, ndo wakatɔlama le ase tominadi ta laadiko. Ɔlɔmbɛdi a laadiko akate ate: ‘Sho takanyodjangɛ diaha nyu  ntɛkɛta dikambo dia Yeso!’ Koko Petero akakadimola ate: “Sho pombaka nkitanyiya Nzambi oko wende owandji lo dihole dia nkitanyiya anto.”

Ewandji w’ɛtɛmwɛlɔ wakadunganɛ la nkɛlɛ ko wakalange ndjaka apɔstɔlɔ. Koko Ofarisɛ ɔmɔtshi wakawelɛka Ngamaliyɛlɛ akemala ndo akate ate: ‘Nyoyale la yewo! Mbeyaka monga ko Nzambi ekɔ kaamɛ la anto anɛ. Onde nyu nangaka ndɔshana la Nzambi?’ Vɔ wakoke dako diande. L’ɔkɔngɔ wa vɔ nkɔmɔla apɔstɔlɔ mfimbɔ, vɔ wakawadjangɛ nto dia ntshika nsambisha, ko wakaakimɔ dia vɔ ntshɔ. Koko dui sɔ koshimba apɔstɔlɔ. Vɔ wakatetemala nsambisha la dihonga tshɛ lokumu l’ɔlɔlɔ lo tɛmpɛlɔ ndo lo luudu la luudu.