Umwi muntu wakatali kweenda wakali kukkala kumulyango watempele mazuba oonse kakumbilila. Bumwi buzuba sikati, wakabona Petro aJohane kabaya kutempele. Wakati kulimbabo: ‘Ndikumbila mali.’ Pesi Petro wakati: ‘Ndilakonzya kukupa chimwi chintu chitali mali. Muzina lyaJesu, buka weende!’ Petro wakamugwasya kuti anyampuke mpawo wakakonzya kweenda! Bantu nibakabona malele aaya, bakabotelwa loko alubo biingi bakaba basyomi.

Pesi bapayizi abaSadusi bakanyema. Bakajata baapostolo, babatola kunkuta akubabuzya kuti: ‘Ngwani wamupa manguzu akuponia mwaalumi ooyu?’ Petro wakati: ‘Manguzu twaapegwa aJesu Kristu ngumwakajaya.’ Mpawo beendelezi bazikombelo bakabakalalila kabati: ‘Amuleke kwaambuula zyaJesu!’ Pesi baapostolo bakati: ‘Tatukooleka pe kwaambuula zyaJesu.’

Petro aJohane nibakaangununwa, bakaya kuli bamwi basikwiiya akubabuzya zyakachitikide. Bakakomba antoomwe kabakumbila Jehova kabati: ‘Tukumbila kuti utupe chibindi chakuti tutaleki kuchita mulimu wako.’ Jehova wakabapa muuya uusalala alimwi teebakaleka kukambawuka akuponia bachiswa. Bantu biingi bakaba basyomi. BaSadusi bakanyema zyakuti bakasunga baapostolo akubabikka muntolongo. Pesi mubusiku oobo, Jehova wakatuma mungelo kuti akajule mulyango wantolongo alubo mungelo wakabuzya baapostolo kuti: ‘Kamuya kutempele mukayiisye nkuko.’

Nibwakacha kuseni, Nkuta Mpati yamaJuda, yabeendelezi bazikombelo yakabuzigwa kuti: ‘Ntolongo ilijalidwe pesi bantu mbimwakasungide tabamo pe! Balikuyiisya mutempele!’ Baapostolo bakasungwa  lubo akutolwa kuNkuta Mpati. Mupayizi mupati wakati: ‘Twamulayilila kuti mutaambi zyaJesu!’ Pesi Petro wakasandula kati: “Tuleelede kumvwa Leza kwiinda bantu.”

Beendelezi bazikombelo bakanyema zyakuti bakali kuyanda kujaya baapostolo. Pesi umwi muFarisi uutegwa Gamaliyeli wakanyampuka mpawo wakati: ‘Amuchenjele! Amwi Leza uli abantu aba. Muyanda kulwana aLeza na?’ Bakamuswiilila. Nibakawuma baapostolo bakabalayilila kuti batachikambawuki, mpawo bakabaleka. Pesi baapostolo teebakaleka pe. Bakiinkilila kunembo kabakambawuka makani mabotu kutempele akung’anda ang’anda kabatayoowi pe.