Jun winik bʼa mi xbʼobʼ bʼejyuk ti wa xwaj kulan skʼanjel limosna ja bʼa spwertaʼil ja templo. Jun ochkʼakʼu, ja yeʼn yila ja Pedro soka Juan kʼotume ja bʼa templo, ti yalaʼa: «Awa paborex, awiki takʼin». Ja Pedro sjakʼa: «Ayni jas oj kawi bʼa masto lek yuja takʼini. Bʼa sbʼiʼil ja Jesús, ¡kʼeʼan sok bʼejyan!». Anto ja Pedro skoltay yajel kʼeʼuk, jaxa winiki kʼe bʼejyuk. Ja ixuk winiki jel gustoʼaxiye yajni yilawe ja milagro it sok jitsan skʼuʼane.

Pe ja sacerdoteʼik sok ja saduceoʼik jel tajkiye. Syamawe ja jekabʼanumiki, yiʼaje och ja bʼa wa xchapawe kʼumal, bʼa wa sbʼiʼilan Sanedrín, sok jobʼjiyile: «¿Machun yawilex ja ipal bʼa stojbʼesel ja winik jaw?». Ja Pedro sjakʼa: «Ja ipali jani yakitikon ja Jesukristo, ja winik maʼ amilawexi». Ja olomaliki awaniye yaljel: «¡Awikxakan stajel tiʼal bʼa Jesús!». Pe ja yeʼnle yalawe: «Tʼilani oj jtaʼtikon tiʼal bʼa yeʼna. Mi oj katikonkan yaljel».

Anto sijpane ja Pedro soka Juan, jaxa yeʼnle wegoxta waj yalyabʼye ja tuk nebʼumanik ja jas ekʼi. Yaweyi orasyon lajan ja Jyoba: «Awa pabor, koltayotikon bʼa mi oj xiwkotikon awaʼteltajel». Ja Jyoba yayi ja yipi, jachuk bʼobʼ snocheyi xcholjel sok stojbʼesel ja matik maloʼaye. Masto jitsanbʼi ja matik skʼuʼane. Ja saduceoʼik jelni kʼe ja skorajaʼe, ja yuj xchʼikawe ja jekabʼanumik bʼa preso. Pe ja akwal jaw, ja Jyoba sjekakon jun yanjel sok sjama ja pwertaʼik bʼa preso sok yalyabʼ ja jekabʼanumiki: «Kumxanik ja bʼa templo sok cholowik tiw».

Yajni el ja kʼakʼu, waj aljukyabʼ ja Sanedrín: «¡Ja preso lutan ay lek sok yabe, pe ja winike matik ayamawexi mixa teyuke! ¡Tixa wane xcholjel bʼa templo!». Ja yuj cha yamjiye ja jekabʼanumiki sok ijiye och bʼa Sanedrín.  Ti aljiyabʼye yuja olomal bʼa sacerdote: «¡Katikon awilex mandar bʼa mokxa ataʼex mas tiʼal bʼa Jesús!». Pe ja Pedro sjakʼa: «Tʼilani oj jkʼuʼuktikonyi ja Dyos jastal jmandaranumtikon yuja ixuk winiki».

Ja olomaliki jelxa tajkel aye sok wa skʼanawe oj smil-e ajyi ja jekabʼanumiki. Pe jun fariseo sbʼiʼil Gamaliel kʼe tekʼan sok yala: «¡Talna abʼajik! Bʼobʼta ja Dyos teysoke ja winike it. ¿Meran maʼ waxa kʼanawex tiroʼanel soka Dyosi?». Ja yeʼnle skʼuʼane ja srasoni. Cha sijpane, ama smakʼawe bʼajtan sok baraʼik sok cha yaweyi mandar bʼa ayawekan xcholjel. Pe ja jaw mi timjiye ja jekabʼanumik. Snochowe xcholjel mini tʼun xiwel ja bʼa templo sok bʼa naʼitsaltik.