Wanpela man i no inap wokabaut i save sindaun long geit bilong tempel na singaut long mani samting long olgeta de. Wanpela apinun, em i lukim Pita na Jon i go insait long tempel. Em i tokim ol: ‘Plis givim mi sampela samting.’ Pita i tokim em: ‘Mi gat wanpela samting i gutpela moa winim mani long givim yu. Long nem bilong Jisas, kirap na wokabaut!’ Na Pita i helpim em long sanap, na em i stat long wokabaut! Bikpela lain manmeri i kirap nogut long dispela mirakel na planti manmeri moa i kamap bilipman.

Tasol ol pris na Sadyusi i belhat. Ol i holimpasim tupela, kisim ol i go long kot, na askim ol strong: ‘Husat i givim strong long yutupela long oraitim dispela man?’ Pita i tok: ‘Mipela i kisim strong long Jisas Krais, em man yupela i bin kilim i dai.’ Ol bikman bilong lotu i singaut: ‘No ken toktok long Jisas!’ Tasol ol aposel i tok: ‘Mipela i mas autim tok long em. Mipela i no inap stop.’

Bihain stret long Pita na Jon i go fri, ol i go long ol arapela disaipel na tokim ol long samting i kamap. Ol i beten wantaim, na tokim Jehova: ‘Plis helpim mipela long strongim bel na bai mipela i wok yet long mekim wok bilong yu.’ Jehova i givim holi spirit long ol, na ol i wok yet long autim tok na oraitim ol man. Planti manmeri moa i kamap bilipman. Ol Sadyusi i jeles tru na arestim ol aposel na putim ol long kalabus. Tasol long nait, Jehova i salim wanpela ensel na i opim ol dua bilong haus kalabus na tokim ol aposel: ‘Go bek long tempel, na skulim ol manmeri long hap.’

Long neks moning, Sanhedrin, kot bilong ol bikman bilong lotu, i kisim toksave: ‘Haus kalabus i lok, tasol ol man yu bin arestim i no stap! Ol i stap long tempel na skulim ol manmeri!’ Ol i arestim gen ol  aposel na bringim ol i kam long Sanhedrin. Hetpris i tok: ‘Mipela i tok strong long yupela long no ken toktok long Jisas!’ Tasol Pita i tok: “Mipela i mas bihainim tok bilong God tasol, na mipela i no ken bihainim tok bilong ol man.”

Ol bikman bilong lotu i belhat nogut tru na ol i laik kilim ol aposel. Tasol wanpela Farisi, Gamaliel, i sanap na tok: ‘Yupela i mas tingting gut! Ating God i stap wantaim ol dispela man. Yupela i laik pait long God?’ Ol i bihainim edvais bilong em. Bihain long ol i paitim ol aposel long stik, ol i tok strong gen long ol i no ken autim tok, na lusim ol i go. Tasol dispela i no pasim ol aposel. Ol i strongim bel na autim yet gutnius, long tempel na long ol haus.