Хаалга чанынга диленип олурар, кылаштап шыдавас кижи турган. Бир катап ол Пётр биле Иоанны көрүп каан. Ол олардан: «Меңээ бир чүүлден берип көрүңерем» — деп дилээн. Пётр аңаа: «Сеңээ акшадан артык үнелиг чүүл бээр мен. Иисустуң ады-биле туруп кылашта!» — дээн. Пётр ооң холундан туткаш, тургузуп кээри билек, ол кылаштай берген. Ону көрген хөй улус аажок өөрүп, Бурганга бүзүреп эгелээн.

Өргээниң бараалгакчылары, саддукейлер элчиннерни судче эккелгеш, айтырган: «Ол күштү кайыын ап тур силер? Ол кижини канчап экиртиптиңер?» Пётр харыылаан: «Биске ол күштү силерниң өлүрүп кааныңар Иисус берген». Олар: «Иисустуң дугайында чугаалаарын соксадыңар!» — деп алгырган. Ынчалза-даа элчиннер: «Бис ооң дугайында чугаалавайн барып шыдавас бис» — дээн.

Пётр биле Иоанны хостаптарга, олар өске өөреникчилерге чүү болганын чугаалап бергеннер. Олар Иеговадан даалга күүседир дидим чорук бээрин дилеп мөргээн. Иегова ыдыктыг сүлдени бээрге, олар улаштыр суртаалдап, улусту экиртип турган. Бурганга бүзүрээн улустуң саны көвүдеп-ле орган. Саддукейлер хорадааш, элчиннерни туткаш, кара-бажыңнап каан. Бурган ол-ла дүне ангелин чоргузуптарга, ол кара-бажыңның эжиктерин ажыдыпкаш, элчиннерге: «Өргээже баргаш, улусту аңаа өөредирин уламчылаңар» — деп чугаалаан.

Эртенинде шажын башкарыкчылары дээди иудей Чөвүлелге чыглып келгеш: «Кара-бажыңның эжиктери хаашкынныг, ында кым-даа чок-тур! Силерниң тудуп алган улузуңар өргээде улус өөредип тур» деп дамчыткан. Элчиннерни катап туткаш, дээди иудей Чөвүлелче эккелген. «Силерге  Иисустуң дугайында чугаалаарын хоруп кагдывыс чоп!» — деп, дээди бараалгакчы кыжанган. Ынчалза-даа Пётр: «Бис улусту эвес, а Бурганны дыңнаар ужурлуг бис» — дээн.

Шажын башкарыкчылары хорадааш, элчиннерни өлүрер деп баарга, Гамалиил деп фарисей кижи: «Далашпаңар! Бурган оларның-биле чадавас. Бурган-биле демисежиксеп тур силер бе?» — дээн. Олар ооң-биле чөпшээрешкен. Олар элчиннерни эттеп-эттеп, улаштыр суртаалдавас кылдыр дужаагаш, салыпкан. Ынчалза-даа элчиннерни чүү-даа доктаадып чадап каан. Олар дидим суртаалдаарын уламчылаан.