Ay jtul winik te ma xjuʼ xbeen ya snajkan sba jujun kʼajkʼal ta skʼanel takʼin ta yochibal te templo. Ta jun tibiltik, la yil te yak ta kʼoel ta templo te Pedro sok te Juane, jich la yaltiklanbey: “Awokoluk, akʼbon jtebuk takʼin”. Te Pedro la sutbey: “Ay bin ya xjuʼ ya kakʼbat te kʼax lekxan-a te bitʼil te takʼine. Ta swenta sbiil te Jesús, ¡jajchan sok beenan!”. Jich te Pedro la snit jajchel. Te winik kaj ta beel. Te ants winiketik cham yoʼtanik yuʼun te kʼalal la yilik te milagro-abi, jich bayal machʼatik ochik ta jchʼuunjel.

Pero te sacerdoteetik sok te saduceoetik bayal ilinik yuʼun. La stsakik te jpuk-kʼopetik, la yikʼtiklanik bael ta stojol te jchajpanwanejetik yuʼun te jwolwanejetik yuʼun relijion te Sanedrín sbiile, jich la sjojkʼoybeyik: “¿Machʼa la yakʼbeyex awuʼelik ta slekubtesel te winike?”. Te Pedro la yal: “Te kuʼelkotik jaʼ la yakʼbonkotik te Jesucristo, te winik la amilike”. Te jwolwanejetik yuʼun te relijionetike jich la yalik ta aw: “Ma xa awalbeyikix skʼoplal te Jesuse”. Te jpuk-kʼopetik la yalik: “Yananix kalbeytik skʼoplal-a te Jesuse, maba ya jkom jbatik ta spasel”.

Jich yuʼun la yichʼik akʼel ta libre te Pedro sok te Juan sok bajtʼ scholbeyik ta ora te yantik jnopojeletik te bin kʼot ta pasel ta stojolike. Jun-nax la stsob sbaik ta skʼoponel te Jehová: “Awokoluk, koltayawonkotik te manchuk ya xiwotik ta yalbeyel skʼoplal te abiile”. Akʼbotik chʼul espiritu yuʼun te Jehová, jich juʼ yuʼunik ta scholelxan te skʼop Dios sok ta slekubtesel jchameletik. Bayalxan ta tul ochik ta jchʼuunjel. Te saduceoetik bayal sbikʼtal yoʼtanik, jaʼ yuʼun la stsakik bael te jpuk-kʼopetik sok la yotseslanik ta karsel. Pero, ta ajkʼabal-abi te Jehová la stikun jtul chʼul-abat ta sjamel te puertaetik yuʼun te karsel sok jich la yaltiklanbey te jpuk-kʼopetike: “Baanik yan buelta ta templo sok cholaik skʼop Dios tey-a”.

Ta yan kʼajkʼal, ay machʼa bajtʼ yal ta Sanedrín: “¡Te karsele yichʼoj yabe, pero te winiketik te la achukike, maba tey ayikix-a! ¡Yakik ta scholel skʼop Dios ta templo!”. Jich yuʼun la schaʼtsakik  bael te jpuk-kʼopetike, la yikʼik bael ta stojol te Sanedrín. Te mukʼul sacerdote la yal: “¡La kalbeyexkotik te ma xa awalbeyikix skʼoplal te Jesuse!”. La sut te Pedro: “Jaʼ ya skʼan ya jchʼuunbeytik smantal te Dios te bitʼil jaʼ ajwalil kuʼuntik, ma jaʼuk te winiketike”.

Te jwolwanejetik yuʼun relijionetik kʼax ilinemik, jaʼ yuʼun kʼan smilik te jpuk-kʼopetike. Jich yuʼun jtul fariseo te Gamaliel sbiil la stejkʼan sba sok la yal: “¡Tsajtayame abaik! Jokinbilikniwan yuʼun Dios te winiketik ini. ¿Yuʼunbal ya akʼan ya atsal abaik sok te Diose?”. La yichʼik ta wenta te bin albotik yuʼune. Jich akʼotik ta libre te jpuk-kʼopetike, manchukme nail la yichʼik majel ta teʼ sok la yichʼik albeyel ta yan buelta te yakuk yijkʼitayik ta scholel te skʼop Diose. Pero ma jaʼuk komotik yuʼun-abi. Maba xiwik ta scholelxan te lek yachʼil kʼop ta templo sok ta nanatik.