Munna we a vha a sa koni u tshimbila o vha a tshi dzula getheni ḽa thembele ḓuvha ḽiṅwe na ḽiṅwe nahone a tshi vha a tshi khou humbela. Ḽiṅwe ḓuvha nga masiari, a vhona Petro na Yohane vha tshi khou dzhena thembeleni. A ri khavho: ‘Ndi khou humbela uri ni mphe tshiṅwe tshithu.’ Petro a ri: ‘Ndi nga ni fha zwa khwine u fhira tshelede. Dzinani ḽa Yesu, takuwa ni tshimbile!’ Petro a mu thusa u takuwa nahone a thoma u tshimbila! Gogo ḽo takadzwa nga honovhu vhuṱolo lwe vhaṅwe vhathu vhanzhi vha mbo ḓi vha vhatendi.

Fhedzi vhotshifhe na Vhasadukei vho vha vho sinyuwa vhukuma. Vho fara vhaapostola, vha vha isa khothe nahone vha vha sengisa vha ri: ‘Maanḓa a u fhodza onoyu munna no a wana ngafhi?’ Petro a ri: ‘Maanḓa ro ṋewa nga Yesu Kristo, we na mu vhulaha.’ Vharangaphanḓa vha vhurereli vha vhidzelela vha ri: ‘Litshani u amba nga ha Yesu.’ Fhedzi vhaapostola vha ri: ‘Ri fanela u amba nga hae. Ri nga si litshe.’

Musi Petro na Yohane vha tshi tou vhofhololwa, vho ya kha vhaṅwe vhafunziwa nahone vha vha vhudza zwe zwa itea. Vho rabela vhoṱhe, vha humbela Yehova vha ri: ‘Ri humbela uri u ri thuse u vha na tshivhindi uri ri kone u bvela phanḓa ri tshi ita mushumo wau.’ Yehova o vha ṋea muya wawe mukhethwa nahone vha bvela phanḓa vha tshi huwelela na u fhodza vhathu. Vhunzhi ha vhathu vho mbo ḓi vha vhatendi. Vhasadukei vho vha na vivho vha mbo ḓi farisa vhaapostola nahone vha vha valela dzhele. Fhedzi nga honoho vhusiku, Yehova o ruma muruṅwa, we a vula miṋango ya dzhele nahone a vhudza vhaapostola uri: ‘Vhuyelelani thembeleni nahone ni funze ni henefho.’

Ḽi tshi tou tsha, tshigwada tsha vharangaphanḓa vha vhurereli tshine tsha vhidzwa Sanhedrini tsho vhudzwa uri: ‘Dzhele i tshee yo khiṋiwa, fhedzi vhanna vhe na vha fara a vha tsheeho! Vha thembeleni, vha khou funza vhathu!’ Vhaapostola vho dovha vha farwa nahone vha ḓiswa phanḓa ha Sanhedrini. Tshifhe muhulu a ri: ‘Ro ni vhudza uri ni songo  tsha dovha na amba nga ha Yesu!’ Fhedzi Petro a fhindula a ri: “Ri fanela u thetshelesa Mudzimu ane a vha muvhusi nṱhani ha vhathu.”

Vharangaphanḓa vha vhurereli vho vha vho sinyuwa vhukuma lwe vha ṱoḓa u vhulaha vhaapostola. Fhedzi Mufarisei ane a pfi Gamaliele o takuwa a ri: ‘Ni ṱhogomele! Mudzimu a nga vha e navho. Naa zwa vhukuma ni ṱoḓa u lwa na Mudzimu?’ Vha mbo ḓi thetshelesa zwe a zwi amba. Nga murahu ha u vha rwa, vho mbo ḓi dovha vha vhudza vhaapostola uri vha litshe u huwelela nahone vha vha litsha vha ṱuwa. Fhedzi zwenezwo a zwo ngo thivhela vhaapostola. Vho bvela phanḓa vha tshi huwelela nga tshivhindi mafhungo maḓifha, thembeleni na nnḓu nga nnḓu.