May lalaki nga diri nakakalakat an nagliliningkod ngan nakikilimos ha may ganghaan han templo kada adlaw. Usa ka kulop, iya nakita hira Pedro ngan Juan nga tisulod ha templo. Nagsiring hiya ha ira: ‘Tagi limos.’ Hi Pedro nagsiring: ‘May ihahatag ako ha imo nga mas maopay pa ha kwarta. Ha ngaran ni Jesus, buhat ngan lakat!’ Tapos, ginbuligan hiya ni Pedro nga makabuhat, ngan an lalaki nagtikang maglakat! Nalipay gud an mga tawo hini nga milagro salit damu pa an nagin tumuroo.

Pero nasina an mga saserdote ngan mga Saduseo. Gin-aresto nira an mga apostol, gindara ha korte, ngan ginpakianhan: ‘Hin-o an naghatag ha iyo hin gahum ha pagtambal hini nga lalaki?’ Hi Pedro binaton: ‘Nakakarawat kami hin gahum tikang kan Jesu-Kristo, nga iyo iginpapatay.’ Gumuliat an mga lider han relihiyon: ‘Ayaw na kamo pag-inistorya mahitungod kan Jesus!’ Pero an mga apostol nagsiring: ‘Kinahanglan namon isumat an mahitungod ha iya. Diri kami maundang.’

Han ginpagawas hira Pedro ngan Juan, kinadto hira ha iba pa nga disipulo ngan iginsumat an nahitabo. Urosa hira nga nag-ampo kan Jehova: ‘Alayon buligi kami nga diri mahadlok basi padayon namon nga mabuhat an imo buruhaton.’ Gintagan hira ni Jehova hin baraan nga espiritu, ngan nagpadayon hira pagsangyaw ngan pagpanambal. Nagtikadamu an nagin tumuroo. Nangabugho an mga Saduseo salit ira gin-aresto an mga apostol ngan ginpriso. Pero pagkagab-i, nagsugo hi Jehova hin anghel nga abrihan an prisohan ngan sidngan an mga apostol: ‘Balik kamo ha templo ngan pagtutdo didto.’

Pagkaaga, may nagsumat ha Sanhedrin​—an korte han mga lider han relihiyon—​nga nasiring: ‘Nakatrangka pa an prisohan, pero waray na didto an mga lalaki nga iyo gin-aresto! Aadto hira nanunutdo ha templo!’ An mga apostol gin-aresto ngan gindara utro ha Sanhedrin. An hitaas nga saserdote nagsiring: ‘Gindid-an na  namon kamo pag-inistorya mahitungod kan Jesus!’ Pero hi Pedro binaton: “Kinahanglan sugton namon an Dios sugad nga magmarando imbes nga an mga tawo.”

Nasina gud an mga lider han relihiyon salit gin-ikaparatay nira an mga apostol. Pero an Pariseo nga hi Gamaliel tinindog ngan nagsiring: ‘Paghirot kamo! Bangin gin-gigiyahan han Dios ini nga mga lalaki. Karuyag ba niyo makig-away ha Dios?’ Namati hira. Katapos nira kastiguhon an mga apostol, gindid-an nira utro hira pagsangyaw, tapos ginpagawas hira. Pero waray ito makapaundang ha mga apostol. Maisugon nga nagpadayon hira pagsangyaw han maopay nga sumat, ha templo ngan ha balay-balay.