Nisy lelahy nalemy vity zay isanandra nangataka tambaravaran̈a tempoly. Tandraraiky, Petera ndreky Jaona hitany nandeha tamy tempoly tao. Hoizy: ‘Mangataka e!’ Ho Petera: ‘Misy raha tsatsarany vola ty amiako anao. Aminy an̈arany Jesosy, mitsangàna, ke mandihana!’ Natsangana Petera lelahy io, ke nahay nandeha. Ravoravo mare olo nahita zen̈y, ke nahaimaro olo nino Jesosy.

Neloko mare iro pisoron̈o ndreky Sadoseo aby io. Nisamborindro iro apostoly aby io, ke nindesindro tamy fitsaran̈a, sady nan̈ontaniandro: ‘Azovy nan̈amia anaro fahifan̈a nampahivan̈a lelahy io?’ Ho Petera: ‘Baka tamy Jesosy Kristy, araiky nivonenaro in̈y.’ Iro pitariky fivavahan̈a aby io neloko mare, sady nivolan̈a: ‘Aza mivolambolan̈a momba Jesosy zen̈y eky!’ Ho apostoly aby io: ‘Zahay tsy maintsy mikoran̈a raha momba izy fo.’

Petera ndreky Jaona koa fa niala tao, iro nandeha tamy pianatra sasany tan̈y nitantara raha nandalo. Niaraka nivavaka iro, ke nangataka: ‘Jehovah, azafady ampia zahay tsy havozovozo, baka hahavita asa nan̈irahanao zahay.’ Namiany Jehovah fan̈ahy masin̈y iro, ke nahavita nitory ndreky nampahivan̈a olo. Maro koa olo nanjary nino Jesosy. Be fô iro Sadoseo aby io, ke nigadraindro apostoly aby io. Koa fa alin̈y andra, nandefa anjely Jehovah nan̈abian̈a varavaran̈a prizon io. Anjely io nivolan̈a taminy apostoly aby io: ‘Mindao mimpody mampianatra amy tempoly an̈y.’

Koa fa maraindrain̈y andra, nisy olo nivolan̈a tamy sefondro pitsara aby io: ‘Varavaran̈a prizon ao migadra, fa olo nigadrainaro efa tsy ao. Mampianatra olo amy tempoly an̈y iro.’ Nisamborindro ndraiky apostoly aby io, ke nindesindro tamy fitsaran̈a tan̈y. Pisoron̈obe  nivolan̈a: ‘Zahay efa nandrova anaro tsy hikoran̈a raha momba Jesosy zen̈y!’ Ho Petera: “Zan̈ahary fo tsy maintsy arehanay volan̈a fa tsy olo.”

Neloko mare iro pitariky fivavahan̈a aby io, ke tiandro hivonen̈a foeky apostoly aby io. Nisy Fariseo araiky, Gamaliela an̈arany, nivolan̈a: ‘Anaro mitandrema, fa mety Zan̈ahary man̈ampy iro io e! Anaro ma mahavita miady amy Zan̈ahary?’ Iro apostoly aby io nipopohindro, avio nirahon̈indro baka tsy hitory eky, avio nambelandro nandeha. Nasaky nitory vaovao tsara fo iro apostoly aby io, ndray tamy tempoly tao, na isaka tran̈o.