Vaba dibakala dimweka wuba manga dyatanga, nandi wuba kwendanga bilumbu byoso va tempelo mwingi kudinda zimbongo. Kilumbu kinkaka bo mvwala Petelo ayi Yoane baba kwenda ku tempelo, dibakala beni wubakamba: ‘Lemvuka, phananu zimbongo.’ Petelo wunkamba: ‘Minu yidi kyuma kilutidi na zimbongo mwingi kuvana. Mu dizina di Yesu, telama ayi dyata!’ Petelo wunsadisa katelama, ayi nandi wutona kudyata! Batu bawombo bayangalala mu mangitukulu mamonika ayi bawombo mu bawu bayiza ba mvawu baklisto.

Vayi zinganga zi Nzambi ayi Basaduse bo bayuwa mawu, bawala nganzi. Bawu bakangisa bapostolo, baba nata ku nzo yi lufundusu ayi baba yuvula: ‘Nani wuluveni mangolo ma kubelusila dibakala dibe manga dyatanga?’ Petelo wuvutula: ‘Yesu Klisto, beno muvonda.’ Zifumu zyoso badasuka ayi bankamba: ‘Bikanu betubilanga matedi Yesu!’ Vayi bapostolo batuba: ‘Befu tulendi bika ko kutubila matedi Nandi.’

Bo baba bikidila, Petelo ayi Yoane bayenda mu thinu kwidi minlandikini minkaka mi Yesu mwingi baba zabikisa mambu maba monikina. Bawu basambila va kimweka ayi badinda kwidi Yave: ‘Lemvuka wutusadisa tuba bakindama mwingi tubaka bu kuvangila kisalu kyaku.’ Yave wuba vana pheve’andi ayi bawu batatamana kulonga ayi kuvanga mangitukulu mwingi kubelusa batu. Thangu ka thangu thalu yi minlandikini yaba bwelama. Basaduse nsoki wuwombo baba monanga bapostolo diawu baba kangisila dyaka ayi baba tula mu buloku. Vayi va khati bwilu, Yave wufila mbasi, mwingi kaba kula mu buloku. Mbasi beni wuba kamba: ‘Vutukanu ku tempelo ayi tatamananu kulonga.’

Va meni meni bayenda zabikisa Basaduse ti: ‘Buloko buzibama vayi babakala lutudidi kuna, basi ko kuawu! Badi ku tempelo mu thangu ayiyi banlonga batu!’ Bawu bakangisa dyaka bapostolo ayi baba nata ku  nzo yinneni yi lufundusu. Nkulutu wu zinganga zi nzambi wutuba: ‘Befu tu yimina lubika bwe tubila matedi Yesu ve!’ Vayi Petelo wuvutula: ‘Theti tufweti tumukina Nzambi, bika batu.’

Zimfumu zi binganga badasuka ayi baba tomba kuvonda bapostolo. Vayi wumweka mu bafalisi wuba vana baba tanguninanga Ngamalieli, wulubula bankaka: ‘Tala, kebanu kwinu! Batu abobo, Nzambi widi yawu! Bukyedika kwandi ti beno mutidi kunwanisa Nzambi?’ Bawu bayuwa mambu katuba. Bo bamana kubabula, baba bikidila benda kuawu, vayi baba tebula moyo babika kubwe longa. Vayi bapostolo basa bika ko kulonga. Bawu batatamana kulonga zitsangu zimboti ku tempelo ayi mu nzo ka nzo.