Juntúul máak móoch u yookeʼ sáamsamal ku kutal kaʼach tu jool le templo u kʼáat caridadoʼ. Juntéenjeakeʼ tu yilaj u kʼuchul Pedro yéetel Juan teʼ templooʼ, ka tu yaʼalajtiʼob: ‹Much tsʼáaʼexten wa baʼax›. Pedroeʼ tu núukajtiʼ: ‹Yaan in tsʼáaiktech junpʼéel baʼal maas maʼalob ke le taakʼinoʼ. Tu kʼaabaʼ Jesuseʼ, ¡líikʼen, xíimbalnen!›. Pedroeʼ tu líiʼsaj le máakoʼ ka joʼopʼ u xíimbal. Le máakoʼoboʼ jach kiʼimakchaj u yóoloʼob yoʼolal le milagroaʼ, ka tu tsʼáaj u fejoʼob tiʼ Jesús.

Chéen baʼaleʼ le sacerdoteʼob yéetel le saduceoʼoboʼ jach pʼuʼujoʼob. Tu machoʼob le apostoloʼoboʼ ka tu bisoʼob tu táan u nuuktakil le judíoʼob yaan teʼ Sanedrinoʼ. Letiʼobeʼ tu kʼáatoʼob tiʼ le apostoloʼoboʼ: ‹¿Máax tsʼáateʼex u páajtalil a tsʼakikeʼex le máakaʼ?›. Pedroeʼ tu núukajtiʼob: ‹Jesucristo, le máax ta kíimseʼexoʼ, letiʼ tsʼáatoʼon u páajtalil k-beetik›. U nuuktakil le judíoʼoboʼ tu yawtoʼob: ‹¡Xuʼuluk a tʼaaneʼex tiʼ Jesús!›. Le apostoloʼoboʼ tu yaʼaloʼobtiʼob: ‹Toʼoneʼ maʼ tu páajtal u xuʼulul k-tʼaan tiʼ letiʼ›.

Ka tsʼoʼok u jáalkʼabtaʼaloʼobeʼ, Pedro yéetel Juaneʼ bin u yaʼaloʼob tiʼ uláakʼ disipuloʼob le baʼax úuchoʼ. Múul orarnajoʼob tiʼ Jéeobaeʼ, ka tu yaʼaloʼobtiʼ: ‹In Yuum, áantoʼon utiaʼal maʼ k-chʼaʼik saajkil tʼaan ta woʼolal›. Jéeoba túuneʼ tu tsʼáaj kiliʼich muukʼ tiʼob, ka seguernaj u kʼaʼaytajoʼob yéetel u tsʼakikoʼob máak. Bey túunoʼ yaʼab máakoʼob tu tsʼáaj u fejoʼob tiʼ Jesús. Le saduceoʼoboʼ jach pʼuʼujoʼobeʼ ka tu beetaj u kʼaʼalal le apostoloʼob carceloʼ. Chéen baʼaleʼ teʼ áakʼaboʼ Jéeobaeʼ tu túuxtaj juntúul ángel utiaʼal u jeʼekʼabtik u joonajil le carceloʼ. Le angelaʼ tu yaʼalaj tiʼ le apostoloʼoboʼ: ‹Xeeneʼex tu kaʼatéen teʼ templooʼ ka kʼaʼaytajnakeʼexiʼ›.

Ka sáaschajeʼ bin aʼalbil tiʼ le Sanedrinoʼ: ‹¡Le carceloʼ chʼotaʼan yéetel llave, chéen baʼaleʼ le máaxoʼob ta kʼaleʼexoʼ minaʼanoʼobiʼ, táan u kʼaʼaytajoʼob teʼ templooʼ!›. Ka bin machbiloʼob tu kaʼatéeneʼ ka bisaʼaboʼob teʼ Sanedrinoʼ. U maas nojchil le sacerdoteʼoboʼ tu yaʼalajtiʼob:  ‹¡T-aʼalajteʼex ka xuʼuluk a tʼaaneʼex tiʼ Jesús!›. Pedroeʼ tu yaʼalaj: ‹Unaj k-uʼuyik u tʼaan Dios bey k-gobernanteeʼ, maʼ u tʼaan máakoʼobiʼ›.

U nuuktakil le judíoʼoboʼ jach pʼuʼujoʼobeʼ ka taakchaj u kíimskoʼob le apostoloʼoboʼ. Gamaliel, juntúul fariseoeʼ, waʼalajeʼ ka tu yaʼalaj: ‹¡Jach ilawileʼex baʼax ken a beeteʼex! Maʼ xaaneʼ Dioseʼ táan u yáantik le máakoʼobaʼ. ¿Jach wa tu jaajil taak a baʼateleʼex tu contra Dios?›. Letiʼobeʼ tu yuʼuboʼob le baʼax tu yaʼalaj Gamalieloʼ, ka tu jáalkʼabtoʼob le disipuloʼoboʼ. Chéen baʼaleʼ táanil tiʼ u beetkoʼobeʼ tu jaʼajatsʼoʼob yéetel tu yaʼaloʼobtiʼob ka xuʼuluk u kʼaʼaytajoʼob. Le apostoloʼoboʼ maʼ tu chʼaʼajoʼob saajkiliʼ. Seguernaj u kʼaʼaytajoʼob teʼ templooʼ bey xan joonaj joonajil.