Goyoʼ toib buñ ni diti labúu gosaa né guirá dzú gorúbu né gonabbu bidxiich roʼ templo. Toibtica godzu bibiʼbu Pedro né Juan cayoʼ lainy templo né buñcu góoch layibu: «Ranába lóoto, colguiduidy tlaʼ bidxiichen naʼ». Pedro cuapy láabu: «Labúu guidudi looy toib cós ni rasac más que bidxiich. Ló laa Jesús, ¡biás né gosaa!». Ór cú Pedro gocné láabu biásbu né gosaabu. Xidal buñ bibiʼ galrradziguiaʼ cú né gosaló bunyibu crer lóo Jesús.

Per sacerdotes né saduceos bidzuitzgoluʼ. Gonásyibu xpiin Jesús né goynéyibu biinreʼ nisló Sanedrín, né gonabdiitzyibu xpiin Jesús: «¿Chú biduidy galnadip lóoto par bisialto buñreʼ?». Pedro goniʼ: «Jesús ni bigaityto, láabu biduidybu galnadip reʼ lóodo». Guirá buñcu gonidiéyibu: «¡Diti guiniʼto de Jesús!». Xpiin Jesús goniʼ: «Non guinido de láabu. Dipa sasiando de gonydo láani».

Ór cú bislaʼyibu Pedro né Juan, né layibu nimaca gooygudxbu ni gosacloyibu a stipnés xcompañeryibu. Guiráyibu bidopyibu né goninéyibu Jehová: «Ranabdo looy, gocné lóodo gapdo balory par diti guisiando de guinido xtiitzlo». Jehová biduidy espíritu santo layibu né labúu goniʼyibu xtiitz Dios né bisialyibu buñ. Né conforma godudy dzú más buñ bidxin góc xpiin Jesús. Buñ saduceos bianladxyibu apóstoles xtuny Jesús né goloʼyibu biinreʼ lachquiip. Per gueʼelcu, Jehová bixelbu toib ángel né bixalbu xpuert lachquiip, né gochbu biinreʼ: «Coltzé lainy templo stoib né colguiniʼ xtiitz Dios».

Stoib dzúcu, goyoʼ ni gooygudx Sanedrín: «¡Lachquiip caa liay láani, per buñ ni gonásto ma diti nayegyibu! ¡Noʼyibu lainy templo caniʼyibu xtiitz Dios!». Gonásyibu xpiin Jesús stoib né goynéyibu biinreʼ nisló Sanedrín. Ór cú sumo sacerdote goniʼ: «¡Ma gochdo lóoto que  ma diti naniʼto más de Jesús!». Pedro cuapy: «Non guisobdo Dios xomod ni rony mandary xalagary guisobdo buñgudxlio».

Guirá buñ ni gosanir nisló religión ni goyoʼ ló dzúcu nigolú bidzuitzyibu né goniiny nagaityibu xpiin Jesús. Ór cú toib fariseo ni góc laa Gamaliel gosagaʼ né goniʼ: «¡Diti cuenunysi gonyto! Pentzi buñreʼ napyibu xcalrracné Dios. ¿Nainy tíilto né Dios la?». Layibu bisobyibu ni goniʼ Gamaliel. Bislaʼyibu xpiin Jesús per nír godinyibu biincu né bar né gochbu biincu que ma diti naniʼyibu más de Dios. Per guirá ngú diti bicaani xpiin Jesús, layibu cuaʼyibu balory goniʼyibu xtiitz Dios lainy templo né yoʼ por yoʼ.