Caulo obedo Laroma ma kinywalo i Taruco. En onongo Laparicayo ma tye ki ngec matut i Cik pa Lujudaya, dok dag Lukricitayo. En onongo donyo i ot ki ot ka ywayo co ki mon ma Lukricitayo ci tweyogi i buc. En bene ocung oneno ka lwak ma gukeco adada gicelo Citefano ki got wang ma oto.

Ento Caulo pe oyeng ki uno Lukricitayo ma i Jerucalem keken. En bene openyo twero ki bot lalamdog madit wek ecit i Damaciko ka dwaro Lukricitayo ma kunnu. I kare ma Caulo dong onyiko cok ki boma man, dero oa ki i polo oryeny ocaro kome, ci en opoto piny i ngom. En owinyo dwan mo ma wacci: ‘Caulo, iyela pingo?’ Caulo openyo ni: ‘In anga?’ Dwan-ni ogamo ni: ‘An a Yecu. Cit i Damaciko, ci gibititi gin ma myero itim.’ Cutcut, wang Caulo oto woko, ci kipeye ki cinge kikele i Damaciko.

I Damaciko, onongo tye Lakricitayo mo ma lagen ma nyinge Anania. Yecu owacce i wang lek ni: ‘A icit i ot pa Juda i yo ma kilwongo ni Atir, ci ipeny pi Caulo.’ Anania odok iye ni: ‘Rwot, yam awinyo lok i kom laco-ni! En tye ka tweyo lupwonnyeni i buc!’ Ento Yecu owacce ni: ‘Cit bote. Ayero Caulo me tito lok me kwena maber-ri bot rok mapol.’

Anania onongo Caulo ci owacce ni: ‘Ominwa Caulo, Yecu ocwala boti wek wangi oyabbe.’ Cutcut, Caulo ocako neno piny doki. En opwonyo lok i kom Yecu ci odoko lalub kore. I nge nongo batija macalo Lakricitayo, Caulo ocako tito kwena i kacokke pa Lujudaya, kacel ki Lukricitayo luwote.  Go kong kit ma Lujudaya guuro kwede i kare ma guneno Caulo ka pwonyo dano lok i kom Yecu? Guwaco ni: ‘Man pe en aye laco ma onongo dwaro lupwonnye pa Yecu?’

Pi mwaka adek, Caulo obedo ka tito kwena bot dano ma gibedo i Damaciko. Lujudaya onongo gidag Caulo mada mumiyo gupiro lok me neke woko. Ento omege guniang pi yub man ci gukonye me lwi. Gutinge ki aduku ci gucwale piny ki i wi cel.

I kare ma Caulo ocito i Jerucalem, en otemo ribbe ki omege ma kunnu. Ento onongo gilwore. Ci lapwonnye mo ma lakica ma nyinge Barnaba okelo Caulo bot lukwena ka otito botgi ni Caulo olokke woko. Caulo ocako pwonyo lok me kwena maber-ri ki mit kom kacel ki kacokke ma i Jerucalem. Lacen, kicako lwonge ni Paulo.