Saulo ji Roma no nɛ a fɔ lɛ ngɛ Taaso. Farisi no ji lɛ, nɛ e le Yuda Mlaa a saminya. E sume Kristofohi a sane kulaa. E ya gblaa nyumuhi kɛ yihi nɛ a ji Kristofohi kɛ jeɔ a wehi a mi, nɛ e woɔ mɛ tsu. Benɛ ni komɛ nɛ a mi mi fu fiaa Steven tɛ nɛ a gbe lɛ po ɔ, e daa si ngɛ lejɛ ɔ.

Tsa pi Kristofohi nɛ a ngɛ Yerusalɛm ɔ pɛ nɛ Saulo suɔ kaa e maa nuu mɛ. E de osɔfo nɔkɔtɔma a ke e ha nɛ e ya Damasko konɛ e ya hla Kristofohi nɛ a ngɛ lejɛ ɔ nɛ e nuu mɛ. Benɛ e piɛ bɔɔ nɛ Saulo maa su ma a mi ɔ, tlukaa a, la ko nɛ nya wa kpɛ kɛ bɔle lɛ, kɛkɛ nɛ e nɔ si. E nu gbi ko nɛ ngɛ dee ke: ‘Saulo, mɛni he je nɛ o ngɛ mi yi mi wae ɔ?’ Saulo bi ke: ‘Mo mɛnɔ?’ Gbi ɔ de ke: ‘Imi Yesu. Moo ya Damasko, nɛ ma tsɔɔ mo nɔ́ nɛ o maa pee.’ Amlɔ nɔuu ɔ, Saulo hɛ ngmɛ yu, nɛ a pɛtɛ e nine si kɛ ho ma a mi ya.

Kristofo no ko nɛ e yeɔ anɔkuale nɛ a tsɛɛ lɛ ke Anania ngɛ Damasko. Yesu de Anania ngɛ nina mi ke: ‘Yaa Yudas we ɔ mi ngɛ blɔ nɛ a tsɛɛ ke Tlɔmɔɔ ɔ nɔ, nɛ o ya hla nyumu ko nɛ a tsɛɛ lɛ ke Saulo ɔ.’ Anania de lɛ ke: ‘Nyɔmtsɛ, i nu jamɛ a nyumu ɔ he sane! E woɔ o kaseli ɔmɛ tsu!’ Se Yesu de Anania ke: ‘Yaa Saulo ngɔ. I hla lɛ konɛ e fiɛɛ sane kpakpa a ngɛ mahi fuu a nɔ.’

Benɛ Anania ya na Saulo ɔ, e de lɛ ke: ‘Ye nyɛmi Saulo, Yesu tsɔ mi ke ma ba bli o hɛ ngmɛ.’ Amlɔ nɔuu ɔ, Saulo bɔni nɔ́ hyɛmi ekohu. E kase Yesu he ní, nɛ e ba pee Yesu se nyɛɛlɔ. Saulo ba pee Kristofo no nɛ a baptisi lɛ, nɛ e piɛɛ e nyɛmimɛ Kristofo ɔmɛ a he kɛ ya fiɛɛ ngɛ kpe he ɔmɛ. Tse o na kaa e maa pee Yuda bi ɔmɛ nyakpɛ kaa Saulo ngɛ nihi Yesu he  ní tsɔɔe? Yuda bi ɔmɛ bi ke: ‘Pi nyumu nɛ ɔ nɛ e wa Yesu kaseli ɔmɛ yi mi ɔ?’

Saulo fiɛɛ jeha etɛ sɔuu kɛ tsɔɔ nihi nɛ a ngɛ Damasko ɔ. Yuda bi ɔmɛ sume Saulo sane kulaa, enɛ ɔ he ɔ, a pee a juɛmi kaa a maa gbe lɛ. Se benɛ nyɛmimɛ ɔmɛ nu he ɔ, a ye bua lɛ nɛ e je ma a mi. A kɛ lɛ wo kusii mi, nɛ a ngmɛɛ e he bɔɔbɔɔbɔɔ kɛ gu puɔ ko nɛ ngɛ ma a gbogbo ɔ mi ɔ mi kɛ ba zugba.

Benɛ Saulo ya su Yerusalɛm ɔ, e bɔ mɔde kaa e kɛ nyɛmimɛ nɛ a ngɛ lejɛ ɔ maa bɔ. Se a ngɛ lɛ gbeye yee. Kaselɔ ko ngɛ lejɛ ɔ nɛ e mi mi hi. A tsɛɛ lɛ ke Banaba. E kɛ Saulo ya tsɔɔ bɔfo ɔmɛ, nɛ e de mɛ níhi nɛ tsɔɔ kaa Saulo tsake niinɛ. Saulo ya piɛɛ asafo nɛ ngɛ Yerusalɛm ɔ he nɛ a fiɛɛ sane kpakpa a kɛ kã. Pee se ɔ, nihi bɔni Saulo tsɛmi ke Paulo.