Saul ubino anyoli mi Roma m’unyolere i Tarso. Ebino Jafarisayo m’ung’eyo Cik mi Juyahudi cuu mandha, man edagu Jukristu lee dit. Ebed ewodho Jukristu ma co ku ma mon cen kud i ot migi pi nibologi i kol. Bende egam ecungo pi nineno udul dhanu m’ubino ku kwinyo kinde ma gibecanyu jalub ma nyinge Stefano pi ninege.

Saul unwang’u nia nitwio Jukristu mi Yerusalem kende de fodi uromo ngo. Egam ekwayu jalam ma dit uore ecidh i adhura mi Dameski kara esend Jukristu ma kuca. Ento kinde ma Saul udhingo adhurane, der moko ma tar ucare man egam epodho i ng’om. Ewinjo dwal moko ubeyero ire kumae: ‘Saul, ibenyayu ragedo i kuma pirang’o?’ Saul upenjo kumae: ‘In i ng’a?’ Edwoko ire kumae: ‘An a Yesu. Cidh i Dameski, e abinyutho iri gin m’ibitimo.’ I saa nica, wang’ Saul ugam utho man jucaku peye apeya ku cinge nitundo i adhura.

Nwang’u Jakristu moko ma nyinge Anania bedo i Dameski keca. Yesu uyero ire i ginmawokiwang’ kumae: ‘Cidhi i ot pa Yuda, i gengi ma julwong’o Atira man isai Saul.’ Ento Anania udwoko kumae: ‘Rwoth, ang’eyo lembe pa ng’atu maeno zoo! Ebed ebolo julub peri i kol!’ Ento Yesu uwacu ire kumae: ‘Cidh i bang’e. Ang’io Saul kara erwei lembanyong’a ni thek dupa.’

E Anania ucidh unwang’u Saul man eyero ire kumae: ‘Umira Saul, Yesu uora kara abin ayab weng’i.’ Ndhundhu nica, Saul ucaku neno piny kendo. Eponjo lembe iwi Yesu man edoko jalub pare. Calu ma dong’ Saul udoko Jakristu m’ulimo batizo, ecaku rweyo i kacokiri karacelo ku Jukristu wagi. Kepar kite ma Juyahudi gizungo ko kinde  ma gibeneno Saul ubeponjo dhanu iwi nying’ Yesu! Giyero kumae: ‘Eni tie ngo ng’atu ma rom m’ubino sendo julub pa Yesu e?’

Pi oro adek zoo, Saul urweyo ni dhanu mir adhura mi Dameski. Juyahudi gidagu Saul man gipangu nia mito ginege cen. Ento umego giwinjo pi gandane man gikonye kara eringi. Pieno, gigam gikethe i katoko man gilure piny i ng’om kud i wang’ gang’ mir adhura.

Kinde ma Saul utundo i Yerusalem, emito edikere kud umego kuca. Ento gibino lwore lee mandha. I ng’eye, umego moko ma mol ma nyinge Barnaba, utero Saul i bang’ jukwenda man ekoro igi nitundo giyio nia Saul udaru lokere andha. E Saul ucaku rweyo lembanyong’a kud amora karacelo ku cokiri mi Yerusalem. I ng’eye, edok eng’eyere ku nyinge ma Paulo.