Mut ba nsébél le Saulô a bééna kunde i man Lôk Rôma; a bi gwéé i tison Tarsô. A bé Farisai, nyi Mbén Lôk Yuda, a ook bikristen. A bé gwel bikristen, bôlôm kiki bôda, a pémhak bo mandap map, a leñek bo i mok. Ngéda miñunbak mi bôt mi bé ôm Stéfanô ngok, letee ni nyemb, Saulô a bé a téé, a nunuk.

Ndi hala a bi kola bé Saulô le a gwel bikristen ndik i tison Yérusalem. A bi bat prisi keñi le i om nye i tison Damaskô, inyu boñ le yak nyoo a noñ bo. Ngéda Saulô a bé bebee ni pam i tison, mapubi ma mbéyél nye mbok yosôna, a kwo isi. A nok kiñ i nkal nye le: ‘A Saulô, inyuki u ntééñga me?’ Saulô a bat le: ‘We njee?’ Kiñ i timbhe le: ‘Men me yé Yésu. Jôp i Damaskô, ndi w’a nok jam u nlama boñ.’ Nlélém ngéda, Saulô a kwo ndim, bôt ba bi gwel nye woo inyu jôpna nye i tison.

Loñge mut yada le Anania, nu a bé kristen, a bé a yiine i tison Damaskô. Yésu a añle nye ikété yiinda le: ‘Ke mbai mut wada le Yuda, i njel ba nsébél le Sép, u yéñ mut le Saulô.’ Anania a kal le: ‘A Nwet, me nyi mam momasôna i mut nu a mboñ! A yé leñ banigil boñ i mok!’ Ndi Yésu a kal nye le: ‘Ke tehe nye. Me mpohol Saulô inyu añle ngandak biloñ ñañ nlam.’

Ngéda Anania a bi tehe Saulô, a kal nye le: ‘A mankéé Saulô, Yésu a ñom me i yibil we mis.’ Kunda yada, mis ma Saulô ma yibla. A nigil i yi njee a yé Yésu, a yila ki nnigil wé. I mbus sôble yé kiki kristen, Saulô a bôdôl téé likalô i mandap ma bibégés ma Lôk Yuda, nye lôñni bikristen bipe.  Baa u nla hégda lelaa hala a bi lôôha hélés Lôk Yuda, ngéda ba bi tehe Saulô a niiga bôt njee a yé Yésu? Ba kal le: ‘Baa i mut nunu bé nyen a bé tééñga banigil ba Yésu, a noñok ki bo bahoma bobasô?’

Saulô a bi tééne bôt ba Damaskô likalô nwii maa. Lôk Yuda i bé oo Saulô, i bôdôl yéñ manjel i nol nye. Kiki lôk kéé i bi nok hala, i hôla nye i so. Ba bi ha nye ikété sel, ba suuhene nye lituba jada li lipénd li tison.

Kiki Saulô a bi bol i Yérusalem, a yéñ le a boma lôk kéé. Ndi ba bé kon nye woñi. Kristen yada le Barnaba, mut minyaô, a kena Saulô yak baôma, a kwés bo nkaa le Saulô a nhéñha toi. Ni makénd momasôna, Saulô a bôdôl añal miñañ minlam ni likoda li Yérusalem. Mbus, ba bôdôl sébél nye le Paul.