Warga negara Rom do si Saulus na tubu di kota Tarsus. Halak Parise do ibana jala diboto ibana do sude taringot Hukum ni halak Jahudi. Sogo hian do rohana tu halak Kristen. Disiksa ibana do angka halak Kristen jala dipenjarahon do nasida. Diida ibana do tingki didangguri angka halak murid ni Jesus na margoar si Stepanus sampe mate.

Alai, ndang holan halak Kristen na di Jerusalem disiksa si Saulus. Dohot do halak Kristen na di kota Damaskus. Alani i, dipangido ibana ma tu sintua ni malim asa dipaloas ibana tusi. Alai tingki di pardalanan, tompu ma diida ibana cahaya. Alani i, gabe hansit ma uluna jala madabu. Dibege ma soara na mandok, ‘Saulus, boasa disiksa ho ahu?’ Didok si Saulus ma, ‘Ise do ho?’ Didok soara i ma muse, ‘Jesus do ahu. Laho ma ho tu Damaskus, asa diboto ho na ingkon ulahononmu.’ Alai tompu ma mapitung si Saulus. Ingkon ditogu-togu do ibana asa sahat tu kota i. 

Adong do di Damaskus halak Kristen na margoar si Ananias. Di tingki i, dibege si Ananias ma didok Jesus, ‘Laho ma ho tu jabu ni si Judas na di dalan Lurus. Lului ma disi na margoar si Saulus.’ Didok si Ananias ma, ‘Tuan, nunga godang na hubege taringot ibana! Dipenjarahon ibana do angka muridmu!’ Alai didok Jesus ma, ‘Laho ma ho. Nunga hupillit si Saulus asa marbarita tu godang bangso.’

Jumpang ni si Ananias ma si Saulus, jala didok ma, ‘Horas Saulus, disuru Jesus do ahu laho pamalumhon ho.’ Gabe boi ma si Saulus marnida. Diparsiajari ibana ma taringot Jesus, jala tardidi ma ibana. Dung i, marbarita ma ibana di sinagoga rap dohot halak Kristen na asing. Boi do dibayangkon ho songon dia  perasaan ni halak Jahudi mangida si Saulus paboahon taringot Jesus? Didok nasida do, ‘Kan, najolo disiksa ibana do angka murid ni Jesus?’

Saleleng tolu taon, marbarita do si Saulus di Damaskus. Sogo ma roha ni halak Jahudi mangida ibana. Gabe naeng dibunu ma ibana. Alai diurupi angka murid na asing do si Saulus. Dipamasuk ma ibana tu karanjang jala dipaturun sian lubang ni tembok ni kota i.

Dung sahat si Saulus di Jerusalem, dijumpangi ibana ma halak Kristen na disi. Alai mabiar do nasida tu si Saulus. Didok sahalak murid na margoar si Barnabas ma tu nasida, na tutu do si Saulus nunga muba. Marbarita ma si Saulus rap dohot angka dongan na di huria Jerusalem. Dung i, gabe si Paulus ma goarna.